दरवर्षी प्रमाणे यंदा देखील मोठया भक्तीमय वातावरणात श्री करवीर निवासिनी अंबाबाई मंदिरात नवरात्रोत्सवाला प्रारंभ झाले असून अश्विन शुद्ध प्रतिपदा अर्थातच घटस्थापनेला सकाळीनऊ वाजता तोफेची सलामी देत अंबाबाईची महापूजा पार पडली आणि अंबाबाईच्या समोरच गाभाऱ्यात श्रीपूजक, इतर महत्वाच्या व्यक्ती आणि देवस्थान पदाधिकाऱ्यांच्या उपस्थितीत घटस्थापना करण्यात आली. तसेच अंबाबाईची उत्सवमूर्ती सनई ताशांच्या गजरात घटाच्या शेजारी विराजमान करण्यात आले आणि ज्या उत्सवाची सर्वजण आतुरतेने वाट पाहत असतात त्या नवरात्रोत्सवाला सुरुवात झाली. दरम्यान सकाळ पासूनच भक्तांनी मंदीरात देवीच्या दर्शनासाठी लांबच लांब रांगा लावल्या असून मंदिरात भक्तांच्या गर्दीने आणि देवीच्या गाण्यांनी परिसर भक्तीमय झाले आहे. घटस्थापनेनंतर करवीर निवासिनी अंबाबाईची दररोज विविध रुपात अलंकारिक पूजा बांधण्यात येत असते तर सोबतच रात्रीचा पालखी सोहळा ही येथील पाहण्यासारखा असतो.

घटस्थापनेच्या पहिल्याच दिवशी कोल्हापुरकरांसाठी गुडन्यूज,कोल्हापुर-मुंबई विमानसेवा दररोज सुरु, असे आहे वेळापत्रक

नऊ दिवस दररोज देवीची वेगवेगळ्या रूपात पूजा:

दरवर्षी नवरात्रोत्सवाच्या पहिल्या दिवशी घटस्थापनेला देवीची पारंपारिक बैठी पूजा बांधली जाते. सकाळी साडे अकराच्या शासकीय पूजेनंतर दुपारची आरती झाली. त्यानंतर दुपारी ३ वाजता सालंकृत पूजा बांधण्यात आली असून पुढे नऊ दिवस दररोज देवीची वेगवेगळ्या रूपात पूजा बांधण्यात येणार असल्याने यंदा भक्तांना नवरात्रौत्सवात भाविकांना अंबाबाईची महागौरी, कामाक्षी, मोहिनी, महिषासूरमर्दिनी अशा वेगवेगळ्या रुपातील पूजा याची देही याची डोळा असे मनमोहक रूप अनुभवता येणार आहे. तर नवरात्रोत्सवामुळे महाराष्ट्राच्या कानाकोपऱ्यातून तरुण मंडळे देवीची ज्योत नेण्यासाठी मंदिरात दाखल झाले असून ज्योत लावल्यानंतर देवीच्या नावाचा गजर करून ते आपआपल्या गावाला मार्गस्थ होत आहेत.तर समितीच्या कार्यालयासमोर सांस्कृतिक कार्यक्रमांसाठी भव्य व सुंदर मांडव उभारण्यात आला आहे. तसेच संपुर्ण मंदिरात आकर्षक विविध रंगांच्या फुलांनी सजावट करण्यात आली आहे.

तोफेची सलामीचा का दिली जाते?

करवीर निवासिनी आई अंबाबाई मंदिरात नवरात्रोत्सव सुरू झाल्यानंतर तसेच विविध वेळी तोफेची सलामी दिली जाते. शिवकालीन परंपरा आजही पश्चिम महाराष्ट्र देवस्थान समितीने जपली आहे. याचा मान कोल्हापूरातील जाधव कुटुंबाकडे आहे. नित्यनियमाने दर शुक्रवारी पालखी सोहळा तसेच आई अंबाबाई जेंव्हा जेंव्हा गाभऱ्यातून बाहेर भक्तांच्या भेटीला येत असते तेंव्हा सलामी दिली जाते. हीच तोफ उडवण्याची देखील एक विशेष पद्धत आहे आणि परंपरा आहे आणि ही परंपरा गेल्या ११ पिढ्यांपासून याच अंबाबाई मंदिरात जाधव कुटुंबियांनी जपली आहे. तर नवरात्रीमध्ये ही तोफ उडविण्यात येत असते.

पहाटे ४ वाजता अंबाबाई मंदिराचे दारे उघडले जातात यानंतर श्री पूजकांकडून घटस्थापनेसाठी पूजेची तयारी करण्यात येत असते. दरम्यान सकाळच्या सुमारास श्री अंबाबाई मंदिराच्या परिसरात धनाजी जाधव यांच्याकडून तोफेची सलामी देण्यात येते आणि यानंतरच नवरात्र उत्सवाला प्रारंभ झाला असे जाहीर करण्यात येत असतं आणि अंबाबाई मंदिराच्या गाभाऱ्यात घटस्थापना होत असते. म्हणून या तोफेच्या सलामीला विशेष असे महत्त्व असते.

Read Latest Kolhapur News And Marathi News