ठाणे : काही दिवसांपूर्वी झालेल्या भांडणाचा राग मनात धरून दारुड्या बापाने आपल्या दीड वर्षांच्या चिमुकलीला रस्त्यावर आपटून हत्या केल्याची धक्कादायक घटना डायघर येथे घडली आहे. अलताफ अन्सारी असे बापाचे नाव असून त्याला दारूचे व्यसन होते. अलताफचे आपल्या पत्नीसोबत नेहमीच भांडण होत असत. याच भांडणाच्या रागातून त्याने ही हत्या केली आहे. या प्रकरणी डायघर पोलिसांनी आरोपी बापाविरोधात हत्येचा गुन्हा दाखल करून त्याला अटक केली आहे.

अलताफ अन्सारी हा आपल्या पत्नी आणि दीड वर्षांच्या चिमुकलीसह डायघरगाव येथील अभयनगर परिसरात राहत होता. मात्र त्याला दारूचे व्यसन असल्यामुळे तो नेहमीच घरात भांडण करत होता. १५ दिवसांपूर्वी देखील त्याचे पत्नीसोबत कडाक्याचे भांडण झाले होते. याच भांडणाचा राग मनात धरून त्याने शुक्रवारी ८ सप्टेंबरला पुन्हा पत्नीसोबत वाद घातला. या भांडणादरम्यान त्याने आपल्या पत्नीला आणि दीड वर्षांच्या चिमुकलीला मारहाण करत त्यांना घराबाहेर काढले. यावेळी राग अनावर झाल्याने आपल्या दीड वर्षांच्या चिमुकलीला रस्त्यावर जोरदार आपटले. या घटनेत चिमुकलीचा दुर्दैवी मृत्यू झाला.

Ajit Pawar: कोल्हापूरच्या सभेपूर्वी अजित पवारांची मोठी घोषणा,कार्यकर्त्यांना आदेश, सांगलीत काय म्हणाले?

दरम्यान, या प्रकरणी अलताफच्या पत्नीने डायघर पोलीस ठाण्यात धाव घेत घडलेला प्रकार सांगितला. पोलिसांनी पत्नीच्या फिर्यादीवरून अलताफ अन्सारी याच्याविरोधात भा.द.वि. कलम ३०२, ३२५, ३२३, ५०४, ५०६ अन्वये हत्येचा गुन्हा दाखल करून त्याला तात्काळ अटक केली आहे. गुन्ह्याचा पुढील तपास पोलीस निरीक्षक वाघमारे करीत आहेत.