जितेंद्र आव्हाड यांच्या ठिय्यानंतर पोलिसांनी केला गुन्हा दाखल

राष्ट्रवादी काँग्रेस पक्षाचे आमदार जितेंद्र आव्हाड यांनी ठाण्यातील नौपाडा पोलिसांना स्थानकात संभाजी भिडे यांनी केलेल्या वक्तव्याचा निषेध नोंदवत गुन्हा दाखल करण्याची मागणी लावून धरली होती. आमदार जितेंद्र आव्हाड त्यांच्या कार्यकर्त्यांसह पोलीस स्थानकात गुन्हा नोंदवून घेत नाही तोपर्यंत ठिया मांडून बसल्याचे दिसून आले. तब्बल एक तासांहून अधिक काळ ठिय्या मांडून काही काळ पोलिसांसोबत चर्चा केल्यानंतर अखेरीस संभाजी भिडे यांनी केलेल्या वक्तव्याबाबत १५३ अ, ५०० आणि ५०५ (२) अंतर्गत ठाण्यात पहिला गुन्हा नोंदवण्यात आला आहे.

ठाण्यात संभाजी भिडेंविरुद्ध गुन्हा दाखल होईल हे अशक्य वाटत होतं- आव्हाड

संभाजी भिडे जे बोलले त्यांच्या विरोधात राष्ट्रद्रोहाचाच गुन्हा दाखल झाला पाहिजे. जगात कुठल्याही राष्ट्रातील महापुरुषांच्या विरोधात अशा प्रकारचे वक्तव्य केले असता त्यांच्यावर राष्ट्रद्रोहाचाच गुन्हा दाखल होतो. पण आपल्या देशात अशा लोकांचे लाड केले जातात. संभाजी भिडे यांच्या विरोधात ठाण्यात गुन्हा दाखल करून घेतला हेच नशीब आहे. नाहीतर ठाण्यात संभाजी भिडेंच्या विरोधात गुन्हा दाखल होईल हे अशक्य वाटत होतं, असं मत आव्हाडांनी व्यक्त केलं आहे. मागील दीड वर्षात पोलिसांनी कधीही अशा प्रकारचं सहकार्य केलं नव्हतं. पण यावेळी आमचा विचार लक्षात घेऊन गुन्हा दाखल केला. त्यासाठी आव्हाडांनी पोलिसांचे आभार मानले. त्याच्याविरोधात गुन्हा तर दाखल केला आहे. आता त्यांना अटक करा, जर अटक नाही झाली तर अधिवेशनात आवाज उठवून पुन्हा आंदोलन करण्याचा इशारा आव्हाड यांनी दिला आहे.

महाराष्ट्रात उठाव झाला पाहिजे

भिडेंच्या वक्तव्यानंतर महाराष्ट्रात उठाव झाला पाहिजे. कोणीही उठून महिलांच्या विरोधात बोलत कोणीही उठून जाती धर्मांच्या विरोधात बोलत कोणीही उठून महापुरुषांच्या विरोधात बोलत. काहीही काही म्हणो पण महाराष्ट्र हा शिव, फुले, शाहू, आंबेडकर यांचाच आहे. मणीपूरचा भडकावं महाराष्ट्रात पेट असल्यामुळे लक्ष विचलित करण्यासाठीच भिडेला पुढे केले आणि म्हणून हा भिडे नाचत असल्याचे स्पष्ट मत असल्याचे आव्हाड म्हणाले.

अमरावती राजापेठ पोलीस ठाण्यात गुन्हा होणार वर्ग

आव्हाड यांनी ठाण्यातील नौपाडा पोलीस ठाण्यात वरिष्ठांसोबत चर्चा करून गुन्हा दाखल करण्याची मागणी केल्यानंतर नौपाडा पोलीस ठाण्यात संभाजी भिडे यांच्याविरोधात भादंवि कलम १५३ अ, ५०० आणि ५०५ (२) अंतर्गत ठाण्यात पहिला गुन्हा नोंदवण्यात आला आहे. सदरचे वक्तव्य हे अमरावती येथील राजापेठ पोलीस ठाणे अंतर्गत घडले असल्याने सदरचा गुन्हा ऑनलाइन पद्धतीने राजापेठ पोलीस ठाणे येथे वर्ग करण्यात येणार असून या प्रकरणाचा पुढील तपास राजापेठ पोलीस अमरावती हे करणार असल्याची माहिती ठाणे पोलीस उपायुक्त गणेश गावडे यांनी दिली आहे.