अपर पोलीस अधीक्षक रायगड-अलिबाग यांच्या पत्रानुसार आंबेनळी घाट रस्ता हा अरूंद व घाट वळणाचा असल्याने रस्त्याचे बाजूला असणारा डोंगरकडा हा या भागात पडणाऱ्या पावसामुळे भूस्खलन होवून डोंगरावरील माती व मोठमोठे दगड रस्त्यावर आल्याने तसेच रस्त्याच्या दुसऱ्या बाजूला खोल दरी असल्याने हा घाट रस्ता वाहतुकीस धोकादायक असल्याचे प्रथमदर्शनी दिसत आहे. कोकण व महाबळेश्वरला जोडणारा पर्यटनाच्या दृष्टीने अत्यंत महत्त्वाचा असलेला हा आंबेनळी घाट आहे.
या रस्त्यावरून वाहतुक सुरू ठेवल्यास नागरिकांच्या सुरक्षिततेचा प्रश्न उद्भवून मोठया प्रमाणांत जिवित व वित्तीय हानी होण्याची दाट शक्यता आहे. त्या कारणास्तव हा रस्ता बंद करण्यात येऊन, पर्यायी रस्ता पोलादपूर खेड-चिपळूण-पाटण- कराड-कोल्हापूर तसेच पाटणकडून सातारामार्गे पुण्याकडे असा पर्यायी मार्ग आहेत, असे अभिप्राय सादर केले आहेत.
या पार्श्वभूमीवर उपविभागीय दंडाधिकारी, महाड यांनी केलेल्या विनंतीनुसार जिल्ह्यातील अतिवृष्टीच्या अनुषंगाने पोलादपूर महाबळेश्वर (आंबेनळी घाट) रस्त्यावरील कोणतीही दुर्घटना टाळण्याच्या दृष्टीने जिल्हाधिकारी डॉ.योगेश म्हसे यांनी या अधिसूचनेच्या दिनांकापासून ते पुढील पंधरा (१५) दिवसांकरिता पोलादपूर-महाबळेश्वर (आंबेनळी घाट) रस्ता सर्व प्रकारच्या वाहतूकीकरिता बंदी आदेश जारी केला आहे.
पोलादपूर महाबळेश्वर (आंबेनळी घाट) रस्ता हा सद्य:स्थितीत सुरक्षिततेच्या दृष्टिकोनातून वाहतुकीकरीता पूर्ण बंद करणेबाबत तसेच त्याबाबत दर १५ दिवसांनी आढावा घेवून घाट रस्ता बंद ठेवण्याबाबत निर्णय घेणे योग्य राहील अशी विनंती केली होती. त्यानुषंगाने या कार्यालया कडील दि.२८/०७/२०२३ रोजीच्या अधिसुचनेनुसार पुढील १५ दिवसांकरीता पोलादपूर महाबळेश्वर (आंबेनळी घाट) रस्ता सर्व प्रकारच्या वाहतूकीकरीता बंद करण्यात आलेला आहे.
प्रकरणी पाऊस, भुस्खलन, दरड कोसळणे इत्यादी परिस्थितीबाबत पोलादपूर महाबळेश्वर (आंबेनळी घाट) येथील वाहतुकीचा दर १५ दिवसांनी सविस्तर आढावा घेण्यात यावा व त्यानुषंगाने सदर घाट रस्ता बंद ठेवण्याबाबत आपलेकडील स्वयंस्पष्ट अहवाल दर १५ दिवसांनी या कार्यालयाकडे सादर करावा असे आदेश देण्यात आले आहेत.
रहिमतपूर- कराड मार्गावर साठेवाडी खिंडीत दरड कोसळली, वाहतूक ठप्प
रहिमतपूर ते कराड मार्गावर वाठार किरोलीलगत साठेवाडी खिंडीत दुपारी दीडच्या सुमारास भली मोठी दरड कोसळल्याने तब्बल दोन ते तीन तास वाहतूक ठप्प झाली होती. रहिमतपूर-कराड मार्गावर साठेवाडी खिंडीत उसाची वाहतूक सुरळीत व्हावी यासाठी खिंड फोडून खोल करण्यात आली आहे. सलग आठ ते दहा दिवस पडत असणाऱ्या पावसामुळे लगतच्या डोंगरकड्यावरील दगड मातीचा वरचा स्तर असणारी दरड अचानक रस्त्यावर कोसळला. दैव बलवत्तर म्हणून यावेळी रस्त्यावर रहदारी नव्हती.
रस्त्यावर दरड कोसळल्यामुळे दुचाकी वगळता चारचाकी वाहनांचा रस्ता पूर्णत: बंद झाला. रहदारीच्या मार्गावर अडचण निर्माण झाल्याने खिंडीच्या दोन्ही बाजूला रस्त्यावर वाहनांच्या रांगा लागल्या होत्या. या मार्गावर ये-जा करणाऱ्या एसटी बस अडकल्याने प्रवाशांची कुचंबना होऊ लागली.
या मार्गावर प्रवास करणाऱ्या दुचाकी स्वाराने खिंडीत दरड कोसळल्याचे कराड उत्तरचे भाजप किसान मोर्चाचे उपाध्यक्ष विकास गायकवाड यांना सांगितले. त्यांनी तात्काळ घटनेची माहिती सार्वजनिक बांधकाम विभागाला कळविली. वाहनधारकांची कुचंबना होऊ नये यासाठी स्वतः पिण्याचे पाणी व जेसीबी, पोकलेन घेऊन घटनास्थळी दाखल असून दरड हटविण्याचे काम सुरू होते.