कोल्हापूर : राष्ट्रवादीचे अध्यक्ष शरद पवार यांच्याविरोधात पक्षातील नेते अजित पवार यांच्या नेतृत्वात बंड करून राज्य सरकारमध्ये सहभागी झालेले कॅबिनेट मंत्री हसन मुश्रीफ हे आज शपथविधीनंतर पहिल्यांदाच कोल्हापुरात दाखल झाले. त्यानंतर मुश्रीफ यांनी विरोधकांच्या आरोपांवर पलटवार करत मी विधानसभा निवडणूक लढवणार आणि राज्यात उच्चांकी मताधिक्याने विजयी होणार, असा ठाम विश्वासही व्यक्त केला आहे. हसन मुश्रीफ यांनी त्यांचे कट्टर विरोधक असलेले भाजप जिल्हाध्यक्ष समरजीतसिंह घाटगे यांना जोरदार प्रत्युत्तर दिलं असून मी पवार एके पवार म्हणत होतो आणि अजून देखील तेच म्हणतो. अजित पवार आणि शरद पवार हे काय वेगळे नाहीत, असंही ते यावेळी म्हणाले आहेत.
राज्य मंत्रिमंडळात समावेश झाल्यानंतर आज पहिल्यांदाच मंत्री हसन मुश्रीफ हे त्यांचा बालेकिल्ला असलेल्या कागल शहरात आले. यावेळी राष्ट्रवादी काँग्रेसच्या अजित पवार गटाच्या वतीने मुश्रीफ यांचे जंगी स्वागत करण्यात आले. कागल येथील गैबी चौकात मुश्रीफ यांचा आठ वेळा मंत्रिमंडळात समावेश झाल्याने भव्य नागरी सत्कार ठेवण्यात आला होता. यावेळी मोठ्या संख्येने मुश्रीफप्रेमी जमा झाले होते. त्यांनी जनतेशी संवाद साधताना अनेक गोष्टींचा उलगडा केला. ‘पक्षश्रेष्ठींच्या आदेशानुसार २०१९ मध्ये अजित पवारांनी पहाटेचा शपथविधी केला. मात्र यावेळी अजित पवारांचा पक्षश्रेष्ठींकडून विश्वासघात करण्यात आला,’ असा गौप्यस्फोट मुश्रीफ यांनी केला.
राज्य मंत्रिमंडळात समावेश झाल्यानंतर आज पहिल्यांदाच मंत्री हसन मुश्रीफ हे त्यांचा बालेकिल्ला असलेल्या कागल शहरात आले. यावेळी राष्ट्रवादी काँग्रेसच्या अजित पवार गटाच्या वतीने मुश्रीफ यांचे जंगी स्वागत करण्यात आले. कागल येथील गैबी चौकात मुश्रीफ यांचा आठ वेळा मंत्रिमंडळात समावेश झाल्याने भव्य नागरी सत्कार ठेवण्यात आला होता. यावेळी मोठ्या संख्येने मुश्रीफप्रेमी जमा झाले होते. त्यांनी जनतेशी संवाद साधताना अनेक गोष्टींचा उलगडा केला. ‘पक्षश्रेष्ठींच्या आदेशानुसार २०१९ मध्ये अजित पवारांनी पहाटेचा शपथविधी केला. मात्र यावेळी अजित पवारांचा पक्षश्रेष्ठींकडून विश्वासघात करण्यात आला,’ असा गौप्यस्फोट मुश्रीफ यांनी केला.
‘२०१४ पासून पाठिंबा देण्याचा विचार, ईडी तर आता आली’
आमदार हसन मुश्रीफ यांच्यावर सुरू असलेल्या ईडीच्या कारवाईमुळे ते भाजपसोबत गेल्याची सध्या सर्वत्र चर्चा सुरू आहे. याबाबत देखील त्यांनी भाष्य केले असून मी ईडीच्या धाकामुळे भाजपसोबत गेलो असे काही जण म्हणत आहेत. मात्र गेली आठ महिने आम्ही कसा खंबीरपणे त्यांचा सामना केला, याबाबत मी विधानसभेच्या निवडणुकीत प्रचारामध्ये सांगेन, असे ते म्हणाले असून ईडी तर आता आली आहे. मात्र आम्ही २०१४ च्या विधानसभा निवडणुकीनंतर भारतीय जनता पक्षाच्या राज्यातील सरकारला पाठिंबा देण्याचा विचार केला होता, असाही दावा मुश्रीफांनी केला आहे.
‘मी कधी ही फाजील आत्मविश्वास बाळगला नाही, यामुळे मला कधी फोन बंद करायची वेळ नाही’
कागलमधील हसन मुश्रीफ यांचे कट्टर विरोधक असलेले कोल्हापूर ग्रामीणचे भाजप जिल्हाध्यक्ष समरजीतसिंह घाटगे हे मुश्रीफांनी युती सरकारमध्ये मंत्रिपदाची शपथ घेतल्याने नाराज झाले होते. मात्र यानंतर त्यांनी पक्षाचे नेते आणि राज्याचे उपमुख्यमंत्री देवेंद्र फडणवीस यांच्याशी त्यांनी चर्चा करत काल कार्यकर्ता मेळावा घेत २०२४ साली मीच आमदार असणार आणि तेही मोठ्या मताधिक्याने निवडून येणार. मी येथे आजच आपल्या विजयाची पायाभरणी करत आहे, असं म्हणत मुश्रीफांना आव्हान दिलं होतं.
घाटगे यांच्या टीकेला हसन मुश्रीफ यांनी जोरदार उत्तर दिले असून शरद पवार हे अजूनही आमचे दैवतच आहेत. तुकोबाची पालखी आळंदीमधून आणि अशा वेगवेगळ्या पालख्या वेगवेगळ्या ठिकाणाहून बाहेर पडतात आणि जातात फक्त विठ्ठलाकडेच. याप्रमाणे आमची पालखीसुद्धा शरद पवारांच्या पंढरीकडे जाणार, असे म्हणत मी पवार एके पवार म्हणत होतो आणि शरद पवार आणि अजित पवार एकच आहेत, असं मुश्रीफ म्हणाले. तसंच माझ्यावर कधी फोन बंद करायची वेळ नाही आली, असा टोलाही त्यांनी समरजीतसिंह घाटगे यांना लगावला आहे.