म. टा. खास प्रतिनिधी, मुंबई : पावसाळ्यामध्ये शहरात अनेक ठिकाणी पाणी साचते आणि साचलेल्या पाण्यामुळे दुर्घटना घडतात. आगामी पावसाळ्यात वीज सुरक्षेच्या दृष्टीने मुंबईतील मध्य, पश्चिम व उत्तर उपनरात किमान १३७ ठिकाणे संवेदनशील असल्याचे समोर आले आहे. या १३७ ठिकाणी पाणी साचून विजेचा धक्का बसण्याची भीती आहे. त्यामुळे ही ठिकाणे धोकादायक बनली असून, त्या ठिकाणी अदानी इलेक्ट्रीसिटीकडून विशेष खबरदारी घेण्यात आली आहे.मुंबईतील एकूण वीज ग्राहकांमध्ये ३१.५० लाख इतके, म्हणजे सर्वाधिक ग्राहक अदानी इलेक्ट्रीसिटीचे आहेत. याअंतर्गत ग्राहकांच्या सुरक्षेसाठी कंपनीने अलीकडेच पावसाळापूर्व तपासणी केली. त्यामध्ये मुंबईभरात पाणी साचण्याची संभाव्य ठिकाणे म्हणून १३७ भाग आढळले. मध्य, पश्चिम आणि उत्तर उपनगरात हे सखल भाग असून तेथे विजेशी संबंधित यंत्रसामग्री आहे. अशा ठिकाणी कुणालाही विजेचा धक्का लागण्याची भीती लक्षात घेता कंपनीने त्या परिसरातील वीजरोधक उपकरणांची संख्या वाढविली आहे. याखेरीज पावसाळ्याच्यादृष्टीने शीघ्र प्रतिसाद चमूदेखील (क्यूआरटी) तैनात करण्यात आला आहे. कोणत्याही संकटावर मात करण्यासाठी या महिन्यापासून केंद्रीय आपत्कालीन नियंत्रण केंद्र (सीडीसीसी) कार्यान्वित करण्यात आले आहे.

अदानी इलेक्ट्रीसिटीचे संपर्क
– वीज प्रवाह खंडित झाल्यास ९५९४५१९१२२ या क्रमांकावर खाते क्रमांकासह संदेश पाठवावा
– www.adanielectricity.com / social media – Facebook / Twitter or Instagram – @Adani_Elec_Mum यावरदेखील संपर्क साधता येईल.

ग्राहकांसाठी सल्ला :

१. इलेक्ट्रिकल मीटर केबिन आणि विद्युत उपकरणांचे पावसापासून संरक्षण करा.
२. मुख्य पुरवठा जागेवर ३० एमए ईएलसीबी किंवा आरसीसीबीचा वापर करा.
३. स्विच आणि प्लग सॉकेटसारखे नादुरुस्त इलेक्ट्रिकल साहित्य, उपकरण बदला.
४. विजेच्या सुट्या वाहिन्या किंवा बटण आदींना ओल्या हातांनी स्पर्श करू नका.
५. मीटर केबिन, पथदिवे किंवा वितरण खांबामध्ये ठिणग्या दिसल्यास त्यांना स्पर्श करायला जाऊ नका.
मुंबईकरांनो, तुमच्या भागातील नालेसफाई झाली नसेल तर चिंता सोडा; ‘या’ व्हॉट्सअ‍ॅप नंबरवर तक्रार करा
टाटा पॉवरची हेल्पलाइन

मुंबईतील साडेसात लाख ग्राहकांना वीज पुरवठा करणाऱ्या टाटा पॉवर कंपनीनेदेखील १० हजारांहून अधिक फिडर पिलर आणि जंक्शन बॉक्सेसवर विजेच्या धक्काविरोधी चाचण्या घेतल्या आहेत. आपत्कालीन स्थितीत १८००-२०९-५१६१ या टोल फ्री क्रमांकावर अथवा ७०४५११६२३७ या व्हॉट्सअप क्रमांकावर संपर्क साधण्याचे आवाहन करण्यात आले. याखेरीज [email protected] या ई-मेलसह https://customerportal.tatapower.com संकेतस्थळावर ९२२३१७०७०७ वर ग्राहक क्रमांकासह एसएमएस पाठविण्याचे आवाहन करण्यात आले आहे.