खेड, पुणे : पुणे जिल्ह्यातील खेड तालुक्यातून एक धक्कादायक घटना समोर आली आहे. झाडावरील आंबे काढण्यासाठी गेलेल्या सेवानिवृत्त पोलिसाचा विजेचा धक्का लागून जागीच मृत्यू झाला आहे. या घटनेमुळे राजगुरुनगर परिसरात एकच खळबळ उडाली होती. मारुती सीताराम घुमटकर ( वय ६५) असे मृत्युमुखी पडलेल्या व्यक्तीचे नाव असून त्यांच्या जाण्याने कुटुंबावर शोककळा पसरली आहे. याबाबत राजगुरुनगर पोलिसात आकस्मिक मृत्यूची नोंद करण्यात आली आहे.
याबाबत पोलिसांनी दिलेली माहिती अशी की, सोमवारी दुपारच्या सुमारास ही घटना घडली. मारुती घुमटकर यांच्या घराशेजारी आंब्याचे झाड आहे. या आंब्याच्या झाडाला आंबे लागलेले होते. आंबे काढण्यासाठी मारुती घुमटकर हे आंब्याच्या झाडावर चढले. मात्र, आंब्याच्या झाडातून वीजेची तार गेल्याची गोष्ट त्यांना माहिती नव्हती. आंबे काढण्याच्या नादात या गोष्टीकडे त्यांचे दुर्लक्ष झाले. झाडावर चढल्यानंतर मारुती घुमटकर यांचा वीजेच्या तारेला स्पर्श होताच त्यांना जोरदार शॉक बसला. वीजेचा जोरदार झटका बसल्याने घुमटकर झाडावरून जोरात खाली पडले. त्यातच त्यांचा जागेवर मृत्यू झाला.
लपायला गेला, तो बाहेर आलाच नाही; लपंडाव खेळताना चिमुकल्याचा करुण अंत; कुटुंबावर शोककळा
या घटनेमुळे राजगुरू नगर परिसरातून हळहळ व्यक्त होत आहे. अनेकदा अशा घटना समोर येत आहेत. या घटनेने विद्युत वाहक तारा आपल्या जवळ असणाऱ्या झाडात नाहीत ना..? त्याचा धोका आपल्याला काही होणार नाही ना असेल तर आपण या ठिकाणी जाणे टाळावे, कुठलाही अनुचित प्रकार घडण्या अगोदर आपणच आपली काळजी घेणे आवश्यक आहे. नाही तर आपल्या जीवावर देखील बेतू शकते. घुमटकर हे काही दिवसांपूर्वीच पोलिस सेवेतून निवृत्त झाले होते. त्यांचा स्वभाव सर्वांशी मिळून राहणारा असाच होता. मात्र, त्यांच्या अचानक जाण्याने त्यांच्या कुटुंबीयांना आणि नातेवाईकांना मोठा धक्का बसला आहे.