हिंगोली : गेल्या दोन दिवसांपासून हिंगोली जिल्ह्यासह राज्यभरात पाण्यावर तरंगणाऱ्या बाबाची चर्चा सुरु आहे. त्या बाबाचा हिंगोली जिल्हा अंनिस कार्यकर्त्यांनी पर्दाफाश केलाय. कोणत्याही तंत्र मंत्राशिवाय बाबसारखंच त्यांनीही पाण्यावर तरंगून दाखवत बाबाला उघडं पाडलंय. संत ज्ञानेश्वर महाराजांनी लिहिलेल्या ग्रंथाचा अभ्यास केल्याने सिद्धी प्राप्त झाल्याचा दावा करत तासनतास पाण्यावर तरंगणाऱ्या बाबाचा हिंगोलीत अंधश्रद्धा निर्मूलन समितीच्या कार्यकर्त्यांनी पर्दाफाश केला आहे. अंधश्रद्धा निर्मूलन समितीचे पदाधिकारी आपल्या सहकाऱ्यांना घेऊन सकाळीच पाण्यावर तरंगणारा बाबा राहत असलेल्या धोत्रा गावामध्ये पोहोचले. या बाबासोबत चर्चा केल्यानंतर अंनिस कार्यकर्ते व पोलीस अधिकाऱ्यांनी धोत्रा शिवारातील विहीर गाठली आणि या विहिरीमध्ये सिद्धी प्राप्त झाल्याचा दावा करणारे हरी महाराज आणि अंधश्रद्धा निर्मूलन समितीचे पदाधिकारी प्रकाश मगरे या दोघांनीही विहिरीत उड्या टाकल्या.
विहिरीमध्ये महाराजांप्रमाणेच अंधश्रद्धा निर्मूलन समितीचे पदाधिकारी देखील पाण्यावर तरंगत असल्याचे स्पष्ट झाले. मात्र नेहमीचा सराव नसल्याने या बाबासारखे जास्त वेळ ते पाण्यावर तरंगू शकले नाही. यानंतर पाण्यावर तरंगणाऱ्या या बाबाने सिद्धी प्राप्त झाल्याच्या दाव्यावरून घुमजाव केले, पोलीस अधिकाऱ्यांनी देखील हा चमत्कार नसून सराव केल्याने कुणालाही पाण्यांवर तरंगता येणं शक्य आहे, असं सांगितलं. त्यामुळे या बाबाच्या अफवांवर विश्वास ठेवू नये, असे आवाहन पोलीस अधिकारी व अंधश्रद्धा निर्मूलन समितीच्या कार्यकर्त्यांनी केले आहे.१२ तास पाण्यावर तरंगणारे बाबा, विहिरीवर लोकांची तुफान गर्दी, कारण विचारलं तर भलताच दावा!
अंधश्रद्धा निर्मूलन समितीचे पदाधिकारी व पाण्यावर तरंगणारे बाबा या दोघांनीही आवाहन स्वीकारले. घटनास्थळावर बाबाचा चमत्कार बघण्यासाठी आलेले नागरिक काही वेळ गोंधळून गेले होते, की नेमका हा प्रकार काय घडतो आहे. बाबाने केलेल्या सर्व प्रकाराबद्दल पोलीस प्रशासन व अंनिसच्या पदाधिकाऱ्यांनी त्यांना समजूत घातली. हा कुठलाही चमत्कार नसून अफवांना बळी पडू नये असे आवाहन पोलिसांनी केले आहे.
