Railway News : प्रवाशांसाठी महत्त्वाची बातमी; मुंबई-पुणे मार्गावरील अनेक रेल्वे गाड्या १७ जुलैपर्यंत रद्द, कोणत्या ट्रेन राहणार सुरू? संपूर्ण यादी

लोणावळा-कर्जत घाट विभागात मुसळधार पावसामुळे अनेक ठिकाणी दरडी कोसळल्याने मध्य रेल्वेची वाहतूक अद्याप पूर्णपणे सुरळीत झालेली नाही. मार्गावरील दुरुस्तीचे काम युद्धपातळीवर सुरू असले, तरी नुकसान मोठ्या प्रमाणात झाल्याने तिन्ही मार्ग पूर्ववत होण्यासाठी आणखी काही कालावधी लागण्याची शक्यता आहे. या पार्श्वभूमीवर, प्रवाशांची गैरसोय टाळण्यासाठी आणि प्रवासाचे नियोजन करता यावे यासाठी मध्य रेल्वेने १० ते १७ जुलैदरम्यान पुणे-मुंबई मार्गावरून धावणाऱ्या महत्त्वाच्या २२ नियमित आणि आठ विशेष गाड्या तात्पुरत्या रद्द करण्याचा निर्णय घेतला आहे. त्यामुळे या काळात प्रवाशांचे प्रचंड हाल होणार आहेत.