अहिल्यानगर: राष्ट्रवादी शरदचंद्र पवार पक्षाचे नेते आणि आमदार जयंत पाटील यांची भाजपचे राष्ट्रीय सरचिटणीस विनोद तावडे यांच्यासोबत झालेली कथित भेट सध्या राज्याच्या राजकारणात चर्चेचा विषय ठरत आहे. पवारांची राष्ट्रवादी सत्तेत सहभागी होणार असल्याने या दोन नेत्यांमध्ये बैठक झाल्याचं सांगितलं जात आहे. पक्षाच्या नव्या वाटचालीबाबत चर्चा करण्यासाठी जयंत पाटील हे आपल्या आमदार-खासदारांसोबत बैठका घेत असल्याचाही दावा केला जात आहे. या पार्श्वभूमीवर राष्ट्रवादी शरदचंद्र पवार पक्षाचे अहिल्यानगरचे खासदार निलेश लंके यांनी आपली भूमिका मांडली आहे.
भाजपसोबत सत्तेत सहभागी होण्याबाबत सुरू असलेल्या चर्चांवर पत्रकारांनी प्रश्न विचारला असता निलेश लंके म्हणाले की, “जयंत पाटील आणि विनोद तावडे यांची भेट कामानिमित्त झाली असेल. आम्हीही अनेक नेत्यांच्या भेटी घेत असतो. मात्र आमच्या पक्षाच्या कोणत्याही गुप्त बैठका झालेल्या नाहीत.प्रत्येक भेटीमागे राजकीय समीकरणे शोधण्याचे कारण नाही,” असं सांगत लंके यांनी सुरू असलेल्या चर्चा फेटाळून लावल्या आहेत.
“आम्ही शरद पवार यांच्या नेतृत्वाखाली काम करतो. वरिष्ठ नेतृत्व जो निर्णय घेईल, त्यावर आमचा पूर्ण विश्वास आहे. त्यामुळे अफवा आणि चर्चांवर भाष्य करण्याचे कारण नाही,” असं सांगत निलेश लंके यांनी पक्षांतर्गत मतभेदांच्या चर्चांनाही पूर्णविराम देण्याचा प्रयत्न केला. त्यांनी राज्यातील सत्ताधाऱ्यांवरही अप्रत्यक्ष निशाणा साधला. “विरोधी पक्षाच्या लोकप्रतिनिधींना विकासनिधी मिळू नये, यासाठी डावपेच आखले जातात. ही प्रवृत्ती लोकशाहीसाठी घातक आहे. सत्ताधाऱ्यांनी विरोधकांना डावलण्याऐवजी संपूर्ण राज्याच्या विकासाचा विचार करावा. सर्व मतदारसंघांना समान न्याय आणि समान निधी मिळालाच पाहिजे,” अशी मागणी खासदार नीलेश लंके यांनी केली.
लंकेंच्या नेतृत्वात महावितरणविरोधात आंदोलन
महावितरणच्या कारभाराविरोधात खासदार निलेश लंके यांच्या नेतृत्वाखाली आज अहिल्यानगरात जोरदार जनआंदोलन छेडण्यात आले. चाणक्य चौकातून निघालेल्या पदयात्रेत शेकडो नागरिक सहभागी झाले. छत्रपती शिवाजी महाराज आणि डॉ. बाबासाहेब आंबेडकर यांच्या पुतळ्यांना अभिवादन करून मोर्चा महावितरणच्या अधीक्षक अभियंता कार्यालयावर धडकला. यावेळी घोषणाबाजीने परिसर दणाणून गेला. आंदोलनादरम्यान स्टेशन रोड परिसरातील आनंदनगर येथे विजेच्या धक्क्याने साडेतीन वर्षांच्या चिमुरडीचा झालेला दुर्दैवी मृत्यू, हा संतापाचा प्रमुख मुद्दा ठरला. त्या निष्पाप चिमुरडीला न्याय मिळालाच पाहिजे अशी आक्रमक भूमिका लंके यांनी घेत महावितरणच्या हलगर्जीपणावर तीव्र शब्दांत हल्लाबोल केला. यावेळी लंके यांनी महावितरणसमोर अघोषित व अनियमित वीजकपात, जळालेले ट्रान्सफॉर्मर वेळेत न बदलणे, स्मार्ट मीटरमुळे वाढलेली व चुकीची वीजबिले, अतिवृष्टीमुळे कोलमडलेली वीजयंत्रणा, सौरऊर्जा व नेट मीटरिंग प्रकरणांतील विलंब, कृषी वीजजोडणीतील रखडलेली कामे, तक्रार निवारण यंत्रणेचे अपयश आणि वारंवार होणारे तांत्रिक बिघाड अशा विविध प्रश्नांचा पाढाच वाचला. या सर्व मागण्यांचे सविस्तर निवेदनही अधिकाऱ्यांना देण्यात आले.