म. टा. प्रतिनिधी, पुणे: वातावरणातील अनुकूल घडामोडींमुळे पुढील काही दिवस पुणे आणि परिसरात पावसाची हजेरी कायम राहण्याची शक्यता आहे. भारतीय हवामानशास्त्र विभागाने पुढील दोन दिवस शहरात दिवसभर ढगाळ वातावरण राहण्याचा, दुपारनंतर मेघगर्जनेसह हलक्या ते मध्यम स्वरूपाच्या सरी पडण्याचा अंदाज व्यक्त केला आहे. घाटमाथ्यावर जोरदार पावसासह तुरळक ठिकाणी अतिवृष्टी होणार असल्याचा इशाराही ‘आयएमडी’ने दिला आहे.
पुणे शहर आणि परिसरात यंदाच्या पावसाळी हंगामाचा चिंब करणारा पहिला अनुभव पुणेकरांनी बुधवारी घेतला. पुणे शहरासह जिल्ह्यात दिवसभर कमी-अधिक पावसाने हजेरी लावली आणि घाटमाथ्यावर जोरदार पाऊस कोसळला. रात्री साडेआठपर्यंत शहरात ११ मिलिमीटर पावसाची नोंद झाली. रात्री उशिराही पावसाची भुरभुर सुरू होती.
सकाळपासूनच शहरावर ढग दाटून आले होते. दिवसभर वाऱ्याची झुळूक वाहत राहिल्याने उष्णतेचा त्रास कमी झाला. दुपारी बाराच्या सुमारास पाऊस सुरू झाला. त्यानंतर दुपारी चारच्या सुमारास जोरदार सरी पडल्या. त्यानंतर अधूनमधून हलका पाऊस सुरू राहिल्याने शहरातील वातावरण पूर्णपणे बदलले. ढगाळ वातावरण आणि पावसामुळे कमाल तापमानात घट होऊन दिवसभरात कमाल २७.४ आणि किमान तापमान २२.१ अंश सेल्सिअस नोंदविण्यात आले.
दिवसभर पावसाने वाहतूक खोळंबली
शहरातील बहुतांश भागांत वाहने रस्त्यावर थांबून होती. काही मार्गांवर नेहमीपेक्षा १० ते १६ मिनिटांचा अतिरिक्त विलंब होत असल्याचेही नोंदवले गेले. मुंढवा, मगरपट्टा, वाघोली, लोणी काळभोर, बंड गार्डन, कोरेगाव पार्क, शिवाजीनगर, स्वारगेट, कात्रज, कोंढवा, बिबवेवाडी, येरवडा, विश्रांतवाडी आदी भागांत वाहतुकीचा फटका बसला. विशेषतः मुंढवा ते मगरपट्टा मार्ग, बंडगार्डन चौक, शिवाजीनगर परिसर, कात्रज चौक; तसेच कोंढवा-इस्कॉन मार्गावर वाहनांच्या रांगा लागल्या.
शहरात बुधवारी दुपारनंतर झालेल्या पावसामुळे शहरात मध्यवस्तीपासून उपनगरापर्यंत सर्वत्र वाहतूक कोंडी झाली. विशेषत: सायंकाळी पावसाने जोरदार हजेरी लावल्याने प्रमुख रस्ते, चौक आणि उड्डाणपुलांवर वाहनांच्या रांगा लागल्या. पाणी साचल्याने वाहतुकीचा वेग मंदावला, तर काही मार्गांवर वाहनचालकांना तासाभराहून अधिक काळ कोंडीत अडकावे लागले.
शहरात दुपारनंतरच्या मुसळधार पावसामुळे अनेक ठिकाणी रस्त्यांवर पाणी साचल्यामुळे वाहनांचा वेग कमी झाला. काही चौकांत सिग्नल ओलांडण्यासाठीही वाहनचालकांना अनेक फेऱ्या थांबावे लागले. कार्यालयातून घरी निघालेल्या कर्मचारीवर्गाला वाहतूक कोंडीचा फटका बसला. सार्वजनिक वाहतूक व्यवस्थेवरही त्याचा परिणाम झाला.
वाहतूक कोंडीमुळे अनेक नागरिकांनी पर्यायी मार्गांचा अवलंब केला. मात्र, प्रमुख मार्गांवरील ताण वाढल्याने अंतर्गत रस्त्यांवरही वाहनांची गर्दी झाली. दुचाकीस्वार आणि कारचालक पाऊस आणि संथ वाहतुकीने हैराण झाले. वाहतूक पोलिसांनी प्रमुख चौकांमध्ये अतिरिक्त कर्मचारी तैनात करून वाहतूक सुरळीत करण्याचा प्रयत्न केला. पाऊस थांबल्यावर हळूहळू वाहतूक पूर्वपदावर येऊ लागली. मात्र, सायंकाळपर्यंत अनेक भागांत वाहनांची संथ गती कायम होती.
शहरात बुधवारी दुपारनंतर झालेल्या जोरदार पावसामुळे टिळक रस्त्यावरील पूरम (अभिनव) चौकात, अक्षरधारा बुक गॅलरीजवळ मोठे झाड कोसळले. यामुळे ठप्प झालेली वाहतूक, अग्निशमन दलाच्या जवानांनी तातडीने झाड हटवून सुरळीत केली. आपटे रस्त्यावरही झाडाची मोठी फांदी पडली. दोन्ही घटनांत पादचारी आणि वाहनचालक थोडक्यात बचावले.