शिवसेना उद्धव बाळासाहेब ठाकरे पक्षातील खासदारांच्या फुटीनंतर पक्षसंघटना मजबूत करण्यासाठी पक्षप्रमुख उद्धव ठाकरे यांनी विदर्भ दौऱ्याला सुरुवात केली आहे. या दौऱ्याच्या निमित्ताने ते शुक्रवारी नागपूर विमानतळावर दाखल झाले असता शिवसैनिकांनी त्यांचे जल्लोषात स्वागत केले. विमानतळ परिसर घोषणाबाजी, फुलांच्या माळा आणि भगव्या झेंड्यांनी दुमदुमून गेला होता. खासदारांच्या बंडानंतर विदर्भात पक्षाची ताकद पुन्हा उभी करण्यासाठी उद्धव ठाकरे यांनी हा दौरा हाती घेतल्याचे मानले जात आहे. नागपूर विमानतळावरील मोठी गर्दी आणि कार्यकर्त्यांचा उत्साह पाहता विदर्भात शिवसेनेची संघटनात्मक ताकद वाढवण्याचा पक्षाचा प्रयत्न अधिक वेगाने सुरू झाल्याचे चित्र दिसून आले. यावेळी विमानतळावर उद्धव ठाकरेंचं स्वागत करण्यासाठी आलेल्या शिवसैनिकांशी त्यांनी संवाद साधला. शिवसैनिकांना संबोधित करताना उद्धव ठाकरे यांनी विरोधकांवर अप्रत्यक्ष निशाणा साधला.