वैदेही सुनील गुलगे (वय १७) असे मृत विद्यार्थिनीचे नाव आहे. ती बारावीत होती. पोलिसांकडून प्राप्त माहितीनुसार, वैदेहीची आई वंदना या शिवणकाम करतात. वैदेहीने जेईईची तयारी करण्यासाठी शिकवणी लावली. मात्र, तिला अभ्यासाचा ताण जाणवायला लागला. ती तणावात राहायला लागली. शुक्रवारी सायंकाळी वंदना या कामानिमित्त बाहेर गेल्या. यावेळी वैदेही ही अभ्यास करीत होती. आई गेल्यानंतर काही वेळाने वैदेहीने लोखंडी हुकला साडी बांधून गळफास घेतला. रात्री तिची आई परतली असता ही घटना उघडकीस आली.

Amit Shah Kolhapur Visit: हा देश काही धर्मशाळा नव्हे! कोल्हापुरात अमित शहांनी काँग्रेस, उद्धव ठाकरेंना डिवचलं
वंदना यांनी हंबरडा फोडला. शेजारी जमले. एका शेजाऱ्याने वाठोडा पोलिसांना माहिती दिली. माहिती मिळताच वाठोडा पोलिसांचा ताफा तेथे पोहोचला. पोलिसांनी पंचनामा करुन वैदहीचा मृतदेह हॉस्पिटलकडे रवाना केला. पोलिसांनी वैदेहीने आत्महत्येपूर्वी लिहिलेली चिठ्ठी जप्त केली. ‘मला जेईईच्या अभ्यासाचा ताण होत आहे. आई मला माफ कर’, असे चिठ्ठीत लिहिले आहे. वैदेहीच्या आत्महत्येप्रकरणी वाठोडा पोलिसांनी आकस्मिक मृत्यूची नोंद करून तपास सुरू केला आहे.

तर दुसऱ्या एका घटनेत, नीट फेरपरीक्षा अवघ्या एक दिवसावर आली असताना, गाझियाबादच्या प्रतापविहार येथील एका २२ वर्षीय नीट परीक्षार्थीने आपल्या राहत्या घरी आत्महत्या केल्याचे समोर आले. पोलिसांनी दिलेल्या माहितीनुसार, जतीन कुमार असे मृताचे नाव आहे. तो वैद्यकीय प्रवेश परीक्षेची तयारी करीत होता. गुरुवारी मध्यरात्रीपर्यंत तो आपल्या खोलीत अभ्यास करीत असल्याचे त्याच्या कुटुंबीयांनी सांगितले. शुक्रवारी सकाळी त्याला उठवण्यासाठी गेले असता तो मृतावस्थेत आढळला. घटनेनंतर विजयनगर पोलिस ठाण्याचे पथक आणि न्यायवैद्यक तज्ज्ञ घटनास्थळी पोहोचले. ‘खोलीत छताच्या पंख्याला बांधलेला तुटलेला फास आढळला, तर मृतदेह जमिनीवर पडलेला होता,’ असे पोलिसांनी सांगितले. तपासादरम्यान, अधिकाऱ्यांनी जतीनच्या मोबाइलमधून एक मिनिट चार सेकंदांचा व्हिडिओ मिळवला, जो त्याच्या मृत्यूपूर्वी काही क्षण आधी रेकॉर्ड करण्यात आल्याचा आरोप आहे. या व्हिडिओमध्ये त्याने आपली अभ्यासाची खोली दाखवली आणि ‘आज काहीतरी वेगळे करण्याचा विचार करीत आहे,’ असे म्हटले. त्याने छताच्या पंख्याला लटकलेल्या फासाकडेही इशारा केला.