अहिल्यानगर जिल्ह्यात राहाता तालुक्यातील निर्मळ पिंपरी परिसरात निळवंडे कालव्याजवळ एका खोलीत गर्भलिंग निदान केले जात असल्याची माहिती पोलिसांना मिळाली होती. श्रीरामपूरचे अपर पोलिस अधीक्षक सोमनाथ वाघचौरे यांच्या नेतृत्वाखाली पोलिसांनी कारवाई सुरू केली. २९ एप्रिलला सर्वप्रथम हा प्रकार उघडकीस आला. सुरुवातीला नेवासा तालुक्यातील डॉ. राहुल भणगे आणि अभिजित भुसाळ यांना पोर्टेबल सोनोग्राफी मशिनसह ताब्यात घेण्यात आले. अटकेनंतर त्यांच्याकडून सुमारे २४ लाख रुपयांचा मुद्देमाल जप्त करण्यात आला. त्यांच्याकडून पोलिसांना माहिती मिळाली की, राहता येथील गर्भलिंगनिदानानंतर काही महिलांचा श्रीरामपूर येथे डॉ. कुटे यांच्या हॉस्पिटलमध्ये गर्भपात करण्यात आला. त्यावर पोलिसांनी डॉ. कुटे यांच्यावर तपास केंद्रित केला. डॉ. कुटे जनरल सर्जन आहेत.

महिला अत्याचारांच्या गुन्ह्यांत मुंबई तिसरी! NCRBची 2024ची आकडेवारी, राज्यातील इतरही 2 शहरांचा समावेश
अनेक वर्षांपासून त्यांचे श्रीरामपूरमध्ये हॉस्पिटल आहे. पूर्वी एकदा ते ‘आयएमए’चे अध्यक्ष होते. त्या माध्यमातून त्यांचा राज्यभर संपर्क आहे. त्यांच्या गुन्ह्याबद्दल मिळालेली माहिती खरी असल्याचे आढळून आले. त्यामुळे पोलिसांनी डॉ. कुटे यांना या गुन्ह्यात अटक केली. पोलिस कोठडीत कसून चौकशी केली असता कुटे यांनी छत्रपती संभाजीनगर येथील एक व बीड जिल्ह्यातील दोन महिलांचा अवैध गर्भपात केल्याची माहिती पोलिसांना दिली.

Nanded Crime : ‘तू मला खूप आवडतेस, माझ्यासोबत आली नाहीतर…’; भावाकडून बहिणीचा छळ, बदनामी झाल्यानं विवाहितेचं टोकाचं पाऊल
पोलिसांनी प्रदीप भाऊसाहेब ढगे (वय ३२, रा. कोऱ्हाळे, ता. राहता) व नीलेश ज्ञानेश्वर भवर (वय ४२, रा. नपावाडी) या दोन एजंटांनाही अटक केली. हे एजंट गर्भवती महिला आणि डॉक्टर यांचा संपर्क करून देत होते. केवळ बारावी पास असलेला ढगे हाही सोनोग्राफी मशिन चालवित होता. हे मशिन पुरवठा करणाऱ्यांचाही आता शोध सुरू आहे.

आतापर्यंत ८० महिलांची नावे उघड
पोलिसांनी केलेल्या तपासात या टोळीने गर्भलिंग निदान आणि गर्भपात केलेल्या ८० महिलांची नावे पोलिसांना मिळाली आहेत. त्यासाठी डॉक्टरचे दहा हजार, एजंटचे तीन हजार व गर्भपात करणाऱ्या डॉक्टरचे वेगळे पैसे, असे वाटप ठरलेले असल्याची माहिती पोलिसांना मिळाली आहे. यातील डॉ. भणगे फिरत्या वाहनातून घरोघरी जाऊन तपासणी करून देत असल्याचे सांगण्यात आले.