महापालिकेच्या आर्थिक नाड्या आणि विकासाचा निधी मंजूर करण्याचे अधिकार स्थायी समितीकडे असतात, त्यामुळे हे पद राजकीयदृष्ट्या अत्यंत वजनदार मानले जाते. या महत्त्वपूर्ण खुर्चीसाठी भाजपमध्ये सध्या जोरदार चुरस निर्माण झाली आहे. यामध्ये श्रीनाथ भिमाले आणि बॉबी ऊर्फ अनिल टिंगरे ही दोन नावे या स्पर्धेत सर्वात आघाडीवर आहेत. या दोघांपैकी कोणाच्या गळ्यात अध्यक्षपदाची माळ पडणार, याविषयी राजकीय वर्तुळात मोठी उत्सुकता आहे. तर गेल्या टर्ममध्ये स्थायी साठी इच्छुक असणाऱ्या आबा शिळीमकर यांच सुद्धा नावं स्थायी साठी शर्यतीत आहे.
मागील चार वर्षे महापालिकेवर प्रशासक असल्याने लोकप्रतिनिधींचा थेट सहभाग नव्हता. आता स्पष्ट बहुमतासह सत्तेत आलेल्या भाजपसमोर पुणेकरांच्या अपेक्षा पूर्ण करण्याचे मोठे आव्हान आहे. निवडणूक प्रचारादरम्यान मुख्यमंत्री देवेंद्र फडणवीस यांनी पुणेकरांना दिलेल्या ‘विकासाच्या गॅरंटी’ची पूर्तता करण्याची वेळ आता आली आहे.
शहरातील रस्ते आणि वाहतूक कोंडीची समस्या सोडवणे. सार्वजनिक वाहतूक व्यवस्था अधिक सक्षम करणे. पाणीपुरवठा आणि ड्रेनेज व्यवस्था सुधारणे. हे मोठे आव्हाने सत्ताधाऱ्यांसमोर असणार आहेत.
त्यामुळे नवीन स्थायी समिती अध्यक्षांवर या विकासकामांसाठी निधीचे नियोजन करण्याची मोठी जबाबदारी असणार आहे. त्यामुळे भाजप हायकमांड या पदासाठी कोणाची निवड करते, यावर पुणे शहराच्या आगामी आर्थिक नियोजनाची दिशा ठरणार आहे.