खेड
खेड शहरालगत असलेल्या खारी नांदगाव परिसरात रविवारी सायंकाळी घडलेल्या एका रहस्यमय दुचाकी अपघातामुळे संपूर्ण परिसरात खळबळ उडाली आहे. एका दिव्यांग व्यक्तीच्या दुचाकीचा अपघात होऊन सदर दुचाकी रस्त्याच्या कडेला असलेल्या शेताच्या चोंड्यात जाऊन कोसळली. मात्र अपघातानंतर दुचाकीस्वार घटनास्थळावरून पळून गेल्याने अनेक प्रश्न उपस्थित झाले आहेत.
अपघातग्रस्त दुचाकीवरून मांसाची वाहतूक केली जात होती का, असा संशय व्यक्त करण्यात येत आहे. काही नागरिकांनी दुचाकीवर प्लास्टिकच्या पिशव्या असल्याचे सांगितले असून, अपघातानंतर त्या पिशव्यांमधील मांस रस्त्यावर पडल्याची चर्चा सुरू आहे. मात्र चालकाने अपघातानंतर घटनास्थळावर न थांबता पळ काढल्याने हा प्रकार अधिकच संशयास्पद ठरला आहे.
दरम्यान, घटनेची माहिती मिळताच खेड पोलीस तात्काळ घटनास्थळी दाखल झाले. पोलिसांनी संपूर्ण परिसराची पाहणी करून रस्त्यालगत आणि शेतात आढळलेले मांसाचे तुकडे ताब्यात घेतले. सदर मांस कोणत्या प्राण्याचे आहे, तसेच त्याची वाहतूक कायदेशीर होती की बेकायदेशीर, याबाबत तपास करण्यासाठी ते पशुवैद्यकीय अधिकाऱ्यांकडे पाठवण्यात आले आहे.
अपघातग्रस्त दुचाकी अपंग व्यक्तीच्या नावावर नोंदणीकृत असल्याचे प्राथमिक तपासात समोर आले असून, प्रत्यक्ष दुचाकी कोण चालवत होते, याबाबत पोलिसांकडून चौकशी सुरू आहे. परिसरातील सीसीटीव्ही फुटेज तपासण्यात येत असून, फरार चालकाचा शोध घेण्यासाठी पोलीस पथके कार्यरत करण्यात आली आहेत. रविवारी सायंकाळी घडलेल्या या घटनेमुळे खारी नांदगाव परिसरात भीती आणि संभ्रमाचे वातावरण निर्माण झाले आहे. हा केवळ अपघात होता की मांस वाहतुकीशी संबंधित प्रकार, याचा उलगडा पोलीस तपासानंतरच होणार असून, नागरिकांचे लक्ष पुढील कारवाईकडे लागले आहे.