फलटण पोलिसांनी दिलेल्या माहितीनुसार फलटण ग्रामीण पोलीस ठाण्यात सागर दादासो दडस यांनी आपला भाऊ सतीश ऊर्फ आप्पा दादासो दडस हा 14 जानेवारीपासून बेपत्ता असल्याची तक्रार दि. 21 जानेवारीला दाखल केली होती. मात्र, सतीशचा थांगपत्ता लागत नव्हता. तक्रारदार सागर यांना त्याच्या मालकाने एक धक्कादायक माहिती दिली की, लखन बंडू बुधावले आणि सतीश तुकाराम माने यांनी काठीने मारहाण करून दूर सोडून दिले आहे.

पुढे तपासात माहिती समोर आली की, संक्रातीदिवशी दुपारी दोनच्या सुमारास सतीश दडस याचे त्याच्यासोबत काम करणाऱ्या लखन बंडू बुधावले व सतीश तुकाराम माने यांच्यासोबत भांडण झाले होते. त्यात त्याच्या प्रेयसीच्या नवऱ्याने सतीशच्या डोक्यात लोखंडी रॉड घातला. त्यामुळे सतीश दडस हा गंभीर जखमी झाला होता.

Sujay Vikhe: अहिल्यानगर ड्रग्स प्रकरणात सुजय विखेंना पोलिसांवरच संशय; म्हणाले, ‘मोठे मासे बाहेर काढा, नाहीतर…’; पोलिसांनाच दिला अल्टिमेटम

सतीशला उपचारासाठी दवाखान्यात नेण्याच्या बहाण्याने त्याला विडणी येथील मांगोबामाळ परिसरात आणण्यात आले. तेथून धुळदेव गावाच्या हद्दीतील भिवरकरवाडी येथे नेऊन पुन्हा डोक्यात दगड घालून त्याची निर्घृण हत्या करण्यात आली. या हत्येमध्ये लखन बंडू बुधवाले, सतीश तुकाराम माने आणि रेश्मा लखन बुधावले या तिघांचा थेट सहभाग असल्याचे तपासात आढळून आले आहे. दरम्यान, सतीश दडस यांची हत्या केल्यानंतर आरोपींनी पुरावे नष्ट करण्यासाठी लाकडे कापण्याच्या मशीनने सतीशच्या मृतदेहाचे तुकडे केले. मुंडके, खांद्यापासून हात आणि गुडघ्यापासून पाय वेगळे करून ते तुकडे दोन पोत्यात भरले.

एक पोते नीरा नदीत तर दुसरे पोते शेततळ्यात टाकले. पोलिसांनी नीरा नदी आणि शेततळ्यात शोध घेउन मृतदेहाच्या तुकड्यांची पोती बाहेर काढली आहेत. पोलीस निरीक्षक संदीप जगताप हे या घटनेचा पुढील तपास करत आहेत. अंगावर शहारे आणणाऱ्या या घटनेमुळे फलटण तालुका हादरून गेला आहे.