मुंबई महापालिका निवडणुकीत महायुतीनं ११८ जागा जिंकत बहुमताचा आकडा ओलांडला. भाजपनं ८९, तर शिंदेसेनेनं २९ जागा जिंकल्या. शिंदेसेनेच्या मदतीशिवाय भाजप बहुमताचा आकडा गाठू शकत नाही. त्यामुळे शिंदेसेनेनं महापौरपदाची मागणी केली. अडीच वर्षांसाठी महापौरपद मागितलं. पण दिल्लीतून याबद्दल स्पष्ट सूचना आल्या आहेत. भाजपनं महापौरपद सोडण्यास स्पष्ट नकार दिलेला आहे.

महापौर पदासाठी सध्याच्या घडीला भाजपमधील पाच जणींची नावं चर्चेत आहेत. निवडणुकीच्या तोंडावर ठाकरेसेनेतून भाजपमध्ये आलेल्या आणि प्रभाग क्रमांक २ मधून विजयी झालेल्या तेजस्वी घोसाळकर यांचं नाव आघाडीवर आहे. त्यांच्या पाठोपाठ राणी द्विवेदी (प्रभाग क्रमांक १३), सीमा शिंदे (प्रभाग क्रमांक १४), जिज्ञासा शाह (प्रभाग क्रमांक १५), श्वेता कोरगावकर (प्रभाग क्रमांक १६), शिल्पा सांगुरे (प्रभाग क्रमांक १७) यांचीही नावं चर्चेत आहेत.

राणी द्विवेदी महाराष्ट्र भाजपच्या सचिव आणि प्रवक्त्या आहेत. भाजपच्या उपाध्यक्ष राहिल्या आहेत. त्या राष्ट्रीय स्तरावरील हॉकीपटूदेखील राहिल्या आहेत. त्यांच्यासोबत सीमा शिंदे, जिज्ञासा शाह, श्वेता कोरगावकर, शिल्पा सांगुरे यांचीही नावं चर्चेत आहेत. या सगळ्या नगरसेविकांचे प्रभाग क्रमांक शेजारी येतात, हे विशेष.

उत्तर मुंबईनं गेल्या काही वर्षांपासून भाजपला सातत्यानं साथ दिली आहे. भाजपचे ८९ पैकी २५ नगरसेवक एकट्या उत्तर मुंबईतून निवडून आलेले आहेत. इथे भाजपनं २८ जागा लढवल्या. त्यातील २५ जागा जिंकल्या. इथे उत्तर भारतीयांचं प्रमाण लक्षणीय आहे. हा मतदार आधी काँग्रेस सोबत राहिला. पण २०२४ पासून तो भाजपकडे वळला. त्यामुळे २०१७ च्या पालिका निवडणुकीतही भाजपनं भरारी घेतली. त्यामुळे उत्तर मुंबईतून भाजप पुढील महापौर कोण, या प्रश्नाचं उत्तर शोधण्याची दाट शक्यता आहे.