अमुलकुमार जैन, रायगड: रायगड जिल्ह्याच्या मुख्यालय असलेल्या अलिबागमध्ये यंदाच्या प्रजासत्ताक दिनाचा शासकीय ध्वजारोहण सोहळा रोजगार हमी व फलोत्पादन मंत्री भरत गोगावले यांच्या हस्ते पार पडणार आहे. यासंदर्भात मंत्रालयाच्या सामान्य प्रशासन विभागाने अधिकृत परिपत्रक काढून गोगावले यांचे नाव निश्चित केल्याने, गेल्या काही दिवसांपासून सुरू असलेल्या चर्चांना पूर्णविराम मिळाला आहे. मात्र, या निर्णयामुळे रायगड जिल्ह्याच्या पालकमंत्रीपदावरून सुरू असलेली शिवसेना आणि राष्ट्रवादी काँग्रेसमधील राजकीय रस्सीखेच पुन्हा चर्चेत आली आहे.
महायुतीची सत्ता स्थापन होऊन बराच कालावधी उलटून गेला असला तरी रायगड जिल्ह्याला अद्याप अधिकृत पालकमंत्री जाहीर करण्यात आलेला नाही. त्यामुळे अलिबागमधील प्रजासत्ताक दिनाच्या ध्वजारोहणाचा मान कोणाला मिळणार, यावरून गेल्या काही दिवसांपासून राजकीय वर्तुळात जोरदार चर्चा रंगल्या होत्या. गतवर्षी प्रजासत्ताक दिन आणि स्वातंत्र्यदिनी राष्ट्रवादी काँग्रेसच्या महिला व बालविकास मंत्री आदिती तटकरे यांच्या हस्ते ध्वजारोहण झाले होते. त्या वेळी मंत्री भरत गोगावले यांनी नाराजी व्यक्त केली होती; मात्र वरिष्ठांचा निर्णय मान्य असल्याचे त्यांनी स्पष्ट केले होते.
यंदा मात्र मंत्रालयाने थेट परिपत्रक जारी करून भरत गोगावले यांच्या नावावर शिक्कामोर्तब केल्याने राजकीय समीकरणे बदलल्याचे चित्र दिसत आहे. जिल्हा मुख्यालयात ध्वजारोहण करण्याची संधी मिळणे हे गोगावले यांच्यासाठी राजकीयदृष्ट्या महत्त्वाचे मानले जात आहे.
Chhatrapati Sambhajinagar: काँग्रेसचा अंतर्गत कलह चव्हाट्यावर! निष्ठावंतांना डावलल्याने खासदार कल्याण काळेंच्या कार्यालयाची तोडफोड
विशेषतः पालकमंत्रीपदासाठी इच्छुक असलेल्या गोगावले यांना हा मान मिळाल्याने त्यांच्या समर्थकांमध्ये उत्साहाचे वातावरण असून, अलिबागमध्ये जल्लोषाची तयारी सुरू झाली आहे.
दरम्यान, रायगडच्या पालकमंत्रीपदावरून मंत्री आदिती तटकरे आणि मंत्री भरत गोगावले यांच्यातील मतभेद अद्याप मिटलेले नाहीत. जिल्ह्यातील विविध शासकीय कार्यक्रमांचे उद्घाटन, ध्वजारोहणाचा मान किंवा प्रशासकीय उपस्थिती यावरून राष्ट्रवादी काँग्रेस आणि शिवसेनेमध्ये वारंवार कुरघोडीचे राजकारण पाहायला मिळत आहे. या वादावर तोडगा काढण्यासाठी उपमुख्यमंत्री अजित पवार यांनी यापूर्वी मध्यस्थी केली असली, तरी अद्याप ठोस निर्णय होऊ शकलेला नाही.
ध्वजारोहणाचा मान भरत गोगावले यांना मिळाल्यानंतर महायुतीतील राष्ट्रवादी काँग्रेस आणि शिवसेनेतील दुरावा कायम राहणार की कमी होणार, याबाबत राजकीय वर्तुळात उत्सुकता आहे. त्याचबरोबर रायगड जिल्ह्याला कायमस्वरूपी पालकमंत्री कधी मिळणार, हा प्रश्न पुन्हा एकदा ऐरणीवर आला असून, राज्य सरकारकडून यावर लवकरच निर्णय होतो का, याकडे सर्वांचे लक्ष लागले आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा