पुणे-सातारा मार्गावर धोकादायक एस आकाराचा घाट रस्ता

पुणे-सातारा महामार्गावरील खंबाटकी घाटात धोकादायक ‘एस’ आकाराचा तीव्र उताराच्या वळणाचा घाट रस्ता होता. घाट रस्त्यावर अपघाताचे प्रमाण वाढले होते. सध्याचा पुणे-सातारा रस्ता घाटातून जात असल्याने काही ठिकाणी दुहेरी लेनचा रस्ता आहे. त्यामुळे वाहतुकीचा वेग कमी होतो. विशेषतः वीकएंड आणि सुट्ट्यांवेळी वारंवार वाहतूक कोंडी होते. त्यामुळे घाट रस्त्याला पर्यायी मार्गाचा विचार सुरू झाला. यामुळे भारतीय राष्ट्रीय महामार्ग प्राधिकरणाने (एनएचएआय) धोकादायक वळण काढून टाकण्यासाठी दोन नव्या बोगद्यांच्या रस्त्याच्या निर्मितीला मान्यता दिली.
Mumbai – Pune Expressway : अटल सेतूपासून थेट पुण्यापर्यंत, अडीच तासाचं अंतर 90 मिनिटांत… मुंबई-पुणे 130 किमीचा नवा एक्सप्रेसवे, मार्ग कुठून कसा?
फेब्रुवारी 2019 मध्ये मान्यता दिल्यानंतर त्याच्या कामांना सुरुवात झाली. मात्र, करोनाच्या संसर्गात हे काम सुरू असले तरी त्याला फारशी गती प्राप्त झाली नव्हती. काम काही काळ रखडले होते. खंबाटकी घाटात प्रत्येकी तीन लेनचे दोन बोगदे साकारण्यासाठी तीन वर्षांची मुदत होती. येत्या मार्च 2026 पर्यंत त्याला मुदतवाढ मिळाली आहे.
Pune News : पुण्यात 56 बोगदे, एलिव्हेटेड कॉरिडॉर… येरवडा-कात्रज 54 किलोमीटरचं भूमिगत जाळं; शहरात मोठी योजना

कसा आहे नवा मार्ग?

खंबाटकीतील नवीन रस्ता हा सुमारे 6.46 किलोमीटर लांबीचा आहे. डाव्या बाजूस 1307 मीटर लांबीचा आणि उजव्या बाजूस 1224 मीटर लांबीचा तीन पदरी दुहेरी बोगदा आहे; तसेच डाव्या बाजूस 1104 मीटर आणि उजव्या बाजूस 930 मीटर लांबीचा व्हायाडक्ट उभारण्यात येत आहे. पुण्याच्या बाजूकडे बोगदा संपल्यानंतर कॅनॉलपर्यंत दरी पूल उभारण्यात येत आहे. त्याचे 15 टक्के काम बाकी आहे. प्रत्येकी तीन पदरी असणाऱ्या दोन बोगद्यांची कामे 90 टक्क्यांपर्यंत पूर्ण झाली आहेत. या बोगद्यांमुळे आता पूर्वी खंबाटकी घाटातून जाण्यासाठी लागणारा 45 मिनिटांचा प्रवासाचा वेळ कमी होणार आहे. बोगद्यामुळे प्रवासाचे अंतर केवळ 10 ते 15 मिनिटांत पूर्ण करता येणार आहे. इंधनही वाचणार आहे. साताऱ्याकडून पुण्याकडे जाणारा बोगदा वाहतुकीस खुला करण्यासाठी शनिवारी चाचणी घेण्यात आली. त्या वेळी साताऱ्याचे जिल्हाधिकारी संतोष पाटील यांच्यासह अनेक अधिकारी उपस्थित होते.

‘एस’ आकाराचे वळण इतिहासजमा होणार

प्रत्येकी तीन पदरी दोन बोगद्यांचे काम पूर्ण झाल्यानंतर आणि वाहतुकीस बोगदा खुला झाल्यानंतर सध्या सुरू असलेला रस्ता पूर्णपणे बंद केला जाण्याची शक्यता आहे. त्यामुळे धोकादायक ‘एस’ आकाराचे वळणही इतिहासजमा होण्याची शक्यता आहे. यामुळे घाटातील अपघातांचे प्रमाण कमी होईल. वेळ वाचणार आहे. ‘एस’ आकार आणि घाट रस्त्याला पर्यायी रस्ता तयार झाल्याने प्रवास अधिक सुरक्षित होणार असल्याचे ‘एनएचएआय’च्या अधिकाऱ्यांनी सांगितले.