मंगळवारी सायंकाळी साडेपाचच्या सुमारास निवडणूक प्रचार संपल्यानंतरही संशयास्पद हालचाली सुरू असल्याचे चित्र दिसून आले. कॅम्प नं. ४, सुभाष टेकडी परिसरातून जाणाऱ्या एका रिक्षामध्ये काळ्या रंगाची बॅग दिसताच स्थानिक उमेदवार नरेश गायकवाड आणि प्रशांत धांडे यांना संशय आला. त्यांनी रिक्षाचा पाठलाग करून ती डॉ. बाबासाहेब आंबेडकर चौकात अडवली. बॅगची झाडाझडती घेतली असता त्यामध्ये मोठ्या प्रमाणात रोख रक्कम आढळून आली.

घटनेची माहिती तात्काळ विठ्ठलवाडी पोलिसांना देण्यात आली. पोलिसांनी घटनास्थळी धाव घेत रिक्षा चालकासह संबंधित दोघांना ताब्यात घेतले आणि पैशांची बॅग जप्त केली. महापालिकेच्या भरारी पथकानेही घटनास्थळी उपस्थित राहून कारवाई केली. महापालिकेचे जनसंपर्क अधिकारी अजय साबळे यांनी बॅगमध्ये अंदाजे ५० लाख रुपयांची रोकड असल्याची प्राथमिक माहिती दिली आहे.

ही रक्कम मतदारांना पैसे वाटप करण्यासाठी आणली जात होती का, याबाबत तपास सुरू असून, रिक्षा चालक व ताब्यात घेतलेल्या व्यक्तींचे जबाब नोंदवले जात आहेत. चौकशी पूर्ण झाल्यानंतर संबंधितांवर गुन्हा दाखल करण्यात येणार असल्याचे विठ्ठलवाडी पोलिसांनी स्पष्ट केले आहे.

दरम्यान, शहरात मतदानाच्या तोंडावर पैशांची सर्रास ने-आण सुरू असताना महापालिकेच्या भरारी पथकाची भूमिका काय, असा सवाल उपस्थित केला जात आहे. प्रचार संपल्यानंतरही अशा प्रकारे मोठ्या प्रमाणात रोकड सापडल्याने निवडणूक प्रक्रियेच्या पारदर्शकतेवर प्रश्नचिन्ह निर्माण झाले आहे. या घटनेमुळे उल्हासनगरमधील निवडणूक वातावरण तापले असून, पुढील तपासाकडे सर्वांचे लक्ष लागले आहे.