जालना: जालना जिल्ह्यातील अंबड तालुक्यातील जामखेड येथे एका ४० वर्षीय व्यक्तीचा मृतदेह दोन दिवसांच्या शोधानंतर तलावात आढळून आला आहे. रामनाथ फकीरराव भोजने असं मृत व्यक्तीचं नाव असून ते ९ जानेवारी रोजी सायंकाळपासून बेपत्ता होते. भोजने यांची दुचाकी, मोबाईल आणि कपडे तलावाच्या काठावर सापडल्याने मृत्यूचं गूढ वाढलं आहे.
नेमकं काय घडलं?
मिळालेल्या माहितीनुसार, सोमवार, १२ जानेवारी २०२६ रोजी दुपारी १ वाजताच्या सुमारास जालन्यातील जामखेड गावाजवळील तलावात एका व्यक्तीचा मृतदेह तरंगताना दिसला. परिसरातील शेतकऱ्यांनी हा मृतदेह पाहिला आणि तात्काळ गावकऱ्यांना माहिती दिली. गावकऱ्यांनी पोलिसांना कळवल्यानंतर पोलिसांनी घटनास्थळी धाव घेऊन अग्निशमन दलाच्या मदतीने मृतदेह बाहेर काढला. मृतदेह बाहेर काढताच गावकऱ्यांनी त्याची ओळख पटवली. हा मृतदेह रामनाथ फकीरराव भोजने (४०) यांचा असल्याचे निष्पन्न झाले. रामनाथ भोजने हे शुक्रवारी, ९ जानेवारी रोजी सायंकाळी चारच्या सुमारास घराबाहेर पडले होते आणि परत आले नव्हते. त्यांच्या घरच्यांनी आणि नातेवाईकांनी त्यांचा खूप शोध घेतला, पण ते कुठेही सापडले नाहीत. अखेर आज त्यांचा मृतदेह तलावात सापडल्याने कुटुंबावर दुःखाचा डोंगर कोसळला.
मृत्यूचे गूढ वाढले
रामनाथ भोजने जेव्हा दोन दिवसांपूर्वी घरातून बाहेर पडले होते, तेव्हा त्यांच्यासोबत त्यांची दुचाकी आणि मोबाईल होता. त्यांचा मृतदेह ज्या तलावात सापडला, त्या तलावाच्या काठावरच त्यांची दुचाकी आणि मोबाईल आढळून आला
तपास सुरू
घटनेचे गांभीर्य लक्षात घेऊन अंबड पोलीस ठाण्याचे पोलीस निरीक्षक यांनी फॉरेन्सिक टीमला पाचारण केले. फॉरेन्सिक टीमने घटनास्थळी येऊन बारकाईने तपास सुरू केला आहे. पोलीस आणि फॉरेन्सिक टीम रामनाथ भोजने यांच्या मृत्यूचे कारण शोधण्याचा प्रयत्न करत आहेत. दोन दिवसांपासून बेपत्ता असलेल्या रामनाथ भोजने यांना मृत अवस्थेत पाहून त्यांच्या घरच्यांनी आणि नातेवाईकांनी एकच आक्रोश केला. पोलिसांनी मृतदेह ताब्यात घेऊन शवविच्छेदनासाठी अंबड येथील रुग्णालयात पाठवला आहे. शवविच्छेदन अहवाल आल्यानंतरच त्यांच्या मृत्यूचे सत्य बाहेर येईल. मात्र, परिसरात रामनाथ भोजने यांच्या मृत्यूबाबत विविध चर्चांना उधाण आलं आहे.
दरम्यान, या प्रसंगी घटनास्थळी अंबड पोलीस स्टेशनचे पोलीस उपनिरीक्षक छोटूराम ठुबे, रवींद्र चव्हाण यांच्यासह अन्य पोलीस अधिकारी आणि कर्मचारी उपस्थित होते.