महापालिका निवडणुकीच्या काळात मुख्यमंत्री माझी लाडकी बहीण योजनेची सध्या चर्चा होत आहे. त्यामागे कारणही तसंच आहे. दरम्यान, राज्य निवडणूक आयोगाने लाडकी बहीण योजनेबाबत राज्य सरकारला महत्त्वाचा आदेश दिला आहे.
राज्य सरकारने सणासुदीच्या निमित्ताने याआधीदेखील लाडक्या बहिणींना खूश करण्याचा प्रयत्न केला आहे. याआधी दिवाळी, भाऊबीज अशा सणांना दोन महिन्यांचे एकत्र पैसे देण्यात आले आहेत. त्यामुळे येत्या मकरसंक्रांतीच्या सणाला म्हणजेच 14 जानेवारीला लाडक्या बहिणींना सरकारकडून दोन महिन्यांचा हफ्ता दिला जाईल, अशी चर्चा होती. हा हफ्ता डिसेंबर आणि जानेवारी महिन्याचा असेल, अशी चर्चा होती. याबाबत विविध ठिकाणी बातम्या देखील प्रसारित झाल्या होत्या. पण काँग्रेसने याबाबत निवडणूक आयोगाला निवेदन पाठवत आक्षेप घेतला होता.
राज्यभरात 29 महापालिकांच्या निवडणुका पार पडत आहेत. या निवडणुकांसाठी 15 जानेवारीला मतदान पार पडत आहे. त्यामुळे 14 जानेवारीला महिलांना दोन महिन्यांचे हफ्ते मिळाले तर त्याचा प्रभाव महिलांवर पडू शकतो. या माध्यमातून 1 कोटी महिला प्रभावित होऊ शकतात आणि ते त्या हिशोबाने मतदान करु शकतात, असा दावा काँग्रेसचा होता. काँग्रेसच्या या निवेदनानंतर आता महत्त्वाची बातमी समोर आली आहे.
राज्य निवडणूक आयोगाने याबाबत राज्याच्या मुख्य सचिवांना महत्वाच्या सूचना दिल्या आहेत. या योजनेचा हफ्ता वितरित करण्याबाबत सरकारने घेतलेल्या निर्णयाबाबत स्पष्टीकरण देण्यात यावे, असं निवडणूक आयोगाने मुख्य सचिवांना म्हटलं आहे. मकरसंक्रांतीला लाडक्या बहीण योजनेचे पैसे देण्याबाबत प्रदर्शित बातम्यांनंतर वस्तुस्थिती समजून घेण्यासाठी निवडणूक आयोगाने याबाबत सूचना केल्या आहेत.
निवडणूक आयोगाचा नेमका आदेश काय?
राज्य निवडणूक आयोगाने याबाबत आणखी एक मोठा निर्णय दिला आहे. लाडकी बहीण योजनेचा लाभ अग्रिम स्वरुपात देण्यास मनाई करण्यात आली आहे. या योजनेचा जानेवारी महिन्याचा लाभ देता येणार नाही, असं निवडणूक आयोगाने म्हटलं आहे. असं असलं तर नियमित किंवा प्रलंबित हफ्ता देता येणार असल्याचं निवडणूक आयोगाने स्पष्ट केलं आहे.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा