भाजप आणि शिंदेसेनेच्या वाटाघाटीत प्रभाग क्रमांक १७३ सेनेच्या वाट्याला गेला. तिथून पूजा कांबळे निवडणूक लढवत आहेत. भाजपनं सुरुवातीला शिल्पा केळुसकर यांना उमेदवारी दिली. पण त्यांना दिलेला एबी फॉर्म परत घेण्यात आला. केळुसकर यांनी याच फॉर्मची कलर झेरॉक्स काढली आणि उमेदवारी अर्ज दाखल केला. त्यांचाही अर्ज ग्राह्य धरण्यात आला. त्यामुळे त्यांची उमेदवारी वैध ठरली. आता त्या शिंदेसेनेच्या उमेगवार पूजा कांबळे यांच्या समोर निवडणूक लढत आहेत. आज कांबळे आणि केळुसकर यांचे कार्यकर्ते आमनेसामने येताच वातावरण तापलं.
भाजप पाठोपाठ शिंदेसेनेची MIM सोबत युती; ठाकरेंनी हिंदुत्व सोडलं म्हणणारे शिंदे आता म्हणतात…
शिंदेसेनेच्या कार्यकर्त्यांना भाजपच्या कार्यकर्त्यांनी ५० खोके एकदम ओके असं म्हणत डिवचलं. त्यानंतर शिल्पा यांचे पती दत्ता केळुसकर यांनी त्यात सुधारणा करत खोक्यांची संख्या ११ वर आणली. ‘पूजा कांबळे यांनी उमेदवारी अर्जात ११ कोटींची मालमत्ता दाखवली आहे. इतकी संपत्ती आली कुठून,’ असा प्रश्न केळुसकर यांनी विचारला. पूजा कांबळे यांच्या संपत्तीचा आकडा आमचे डोळे पांढरे झाले. त्यामुळेच आम्ही ११ खोक्यांची घोषणा देत आहेत. ही घोषणा त्यांच्या पक्षासाठी नाही. फक्त कांबळे यांनाच उद्देशून आहे, असं केळुसकर यांनी सांगितलं.
काँग्रेस-भाजपची युती झालेल्या अंबरनाथमध्ये मोठा ट्विस्ट; शिंदेंचा चव्हाणांना शह, भाजप चेकमेट
दुसरीकडे शिंदेसेनेच्या कार्यकर्त्यांनी भाजपच्या कार्यकर्त्यांना जोरकस प्रत्युत्तर दिलं. केळुसकर यांनी एबी फॉर्मची कलर झेरॉक्स घेऊन अर्ज भरल्यानंतर भाजपनं त्यांच्या विरोधात तक्रार नोंदवली होती. तोच धागा पकडत शिंदेसेनेच्या कार्यकर्त्यांनी केळुसकर यांना डिवचलं. गली गली में शोर है, एबी फॉर्म चोर है, अशा घोषणा शिंदेसेनेकडून देण्यात आल्या. त्यामुळे भाजपनं दिलेली तक्रार भाजपच्याच उमेदवारासाठी अडचणीची ठरताना दिसली.