कुलदीप जाधव, पुणे : ‘ताई, माई, अक्का विचार करा पक्का… आला रे आला, आपला माणूस आला…’ अशा घोषणा देत प्रचाराचा गजर सुरू असतानाच एका सोसायटीत मात्र उमेदवाराला गेटवरच ‘रेड सिग्नल’ मिळाला. प्रचारासाठी आलेल्या उमेदवार व समर्थकांना वॉचमनने अडवून, सोसायटीत प्रवेश नाकारल्याने वादाला तोंड फुटले आणि हा संघर्ष थेट पोलिस चौकीपर्यंत पोचला. कर्वेनगर–हिंगणे होम कॉलनी प्रभागातील ही घटना सध्या शहरात चर्चेचा विषय ठरली आहे.
महापालिका निवडणुकीच्या पार्श्वभूमीवर उमेदवार आणि त्यांचे कार्यकर्ते घरोघरी प्रचारासाठी फिरताना दिसत आहेत. मात्र, काही भागांत प्रचारात त्यांना वेगवेगळ्या अडथळ्यांचा सामना करावा लागत असल्याचे दिसून येत आहे. कर्वेनगरमध्ये एका उमेदवाराला प्रचारात आलेल्या अडथळ्याची पोलिस दफ्तरी नोंद झाली आहे.
कर्वेनगर-हिंगणे होम कॉलनी प्रभागात जिजाई गार्डन परिसरातील एका सोसायटीत प्रचारासाठी बंदी घालण्यात आली आहे. या ठिकाणी आलेल्या एका उमेदवाराला आणि समर्थकांना सोसायटीच्या वॉचमनने प्रवेश नाकारला. ‘कोणालाही आत प्रवेश नाही,’ असे स्पष्ट सांगून गार्डने प्रचारकर्त्यांना अडवले. यावरून दोन्ही बाजूंमध्ये शाब्दिक वाद झाला. प्रचारकर्त्यांनी सोसायटीच्या सेक्रेटरीशी संपर्क साधण्याचा प्रयत्न केला. मात्र, त्यांचा संपर्क क्रमांकही देण्यात न आल्याने तणाव वाढला.
अखेर संबंधित उमेदवाराने पोलिसांच्या ११२ या हेल्पलाइनवर संपर्क साधून घडला प्रकार सांगितला आणि मदत मागितली. त्यानुसार पोलिस कॉप त्या ठिकाणी दाखल झाले. त्यांनी परिस्थितीचा आढावा घेतला आणि सोसायटीनेच निर्णय घेतला असेल, तर आपण काही करू शकत नाही, असे उमेदवाराला सांगून, त्या नंतरही काही तक्रार असल्यास रामनगर पोलिस चौकीत तक्रार देण्याची सूचना केली.
निवडणूक प्रचाराच्या पार्श्वभूमीवर अनेक सोसायट्यांनी खासगी मालमत्तेचा हवाला देऊन प्रचारास मज्जाव केल्याने अशा प्रकारचे वाद वाढत आहेत. प्रचाराचा हक्क आणि सोसायटीचे अंतर्गत नियम यातील संघर्ष आता पोलिस चौकीपर्यंत पोचू लागले आहेत.
घरफोड्या आणि चोरीच्या घटनांच्या पार्श्वभूमीवर सोसायट्यांमध्ये रहिवाशी वगळता ‘बाहेर’च्या व्यक्तींना थेट प्रवेश नाकारला जातो. त्यासाठी विविध प्रकारच्या सुरक्षा योजनांचा अवलंब केला जातो. या योजना उमेदवारांना प्रचारात अडथळा ठरत आहेत. अनेक सोसायट्यांनी उमेदवारांना कार्यकर्त्यांसह प्रचाराला बंदी केलेली आहे. त्यामुळे सोसायटी पदाधिकाऱ्यांची परवानगी घेतल्याशिवाय सुरक्षारक्षक उमेदवारांना आतमध्येही सोडत नाहीत, असे चित्र आहे.
काही ठिकाणी पूर्वपरवानगी आणि वेळ घेऊन सोसायट्यांत प्रचाराला जावे लागते, असे उपनगरातील एका उमेदवाराने सांगितले, तर ‘उमेदवारासोबत केवळ एक किंवा दोन कार्यकर्त्यांना प्रवेश दिला जातो,’ असे अन्य एकाने सांगितले.