शिवलिंगावर दर्शन घेण्यास बंदी

श्री घृष्णेश्वर मंदिरात शिवलिंगाचं दर्शन घेण्यावर बंदी घालण्यात आली आहे. श्री घृष्णेश्वर मंदिरात अनेक वर्षांपासून भाविक गाभाऱ्यात जाऊन शिवलिंगावर डोकं ठेवून दर्शन घेत असत. तसंच, शिवलिंगावर अभिषेक करण्याचीही परंपरा होती. मात्र, सध्या नाताळच्या सुट्ट्या सुरू असल्याने पर्यटनासाठी येणाऱ्या भाविकांची संख्या खूप वाढली आहे. शनिवारी सकाळपासूनच दर्शनासाठी 3 ते 4 तासांच्या लांबच लांब रांगा लागल्या होत्या. एवढ्या मोठ्या गर्दीला नियंत्रित करणं प्रशासनासाठी कठीण झालं होतं. त्यामुळे, प्रशासनाने दुपारी 12 वाजेपासून भाविकांना गाभाऱ्यात जाण्यास मनाई केली.
Virar – Alibaug : विरार-अलिबाग आता सुस्साट! 129 किमीचा मार्ग, मुंबई आणि कोकणात थेट जोडणार; राज्य सरकारचा नवा प्रोजेक्ट

प्रवेशद्वारावरुनच दर्शन घ्यावं लागणार

आता भाविकांसाठी प्रवेशद्वारावरील सभामंडपासमोरच ज्योतिर्लिंगाची मूर्ती ठेवली आहे. या मूर्तीचं दर्शन भाविकांना बाहेरूनच घेता येणार आहे. या नवीन व्यवस्थेमुळे भाविकांचा वेळ वाचणार आहे. मात्र, अनेक वर्षांपासून चालत आलेली थेट दर्शनाची परंपरा खंडित झाल्याने भाविकांमध्ये उलटसुलट चर्चा सुरू आहे. या गर्दीवर नियंत्रण मिळवण्यासाठी मंदिर परिसरात अतिरिक्त सुरक्षा रक्षकही तैनात करण्यात आले आहेत.

मंदिर प्रशासनाची अधिकृत प्रतिक्रिया नाही

कोरोना काळातही अशाच प्रकारे केवळ प्रवेशद्वारातून दर्शनाची मुभा देण्यात आली होती. त्यावेळीही गर्दी टाळण्यासाठी हा निर्णय घेण्यात आला होता. मात्र, आता वाढत्या गर्दीचं कारण देत प्रशासनाने घेतलेल्या या ‘नो एन्ट्री’च्या निर्णयावर देवस्थानचे अध्यक्ष आणि विश्वस्तांनी सध्या कोणतीही अधिकृत प्रतिक्रिया दिलेली नाही. या निर्णयामुळे भाविकांच्या भावना दुखावल्याचीही चर्चा आहे. यापुढेही ही व्यवस्था कायम राहणार की नाही, याबद्दल अजून स्पष्टता नाही.