वडिलांच्या फोननंतर उलगडले भयानक सत्य

धाराशिव जिल्ह्यातील सात्रा येथील रहिवासी असलेल्या विद्याधर प्रकाश शिंदे या इंजिनिअरिंगच्या विद्यार्थ्याने सोलापूर शहराजवळील तळेहिप्परगा येथील ऑर्किड कॉलेजच्या बॉईज हॉस्टेलमधील रूम नंबर 408 मध्ये गुरुवारी रात्रीच्या सुमारास आत्महत्या केली. विद्याधर रोज रात्री आपल्या वडिलांशी फोनवर बोलत असे. मात्र, गुरुवारी त्याने वडिलांना फोन केला नाही. त्यामुळे वडील प्रकाश शिंदे यांनी मुलाला फोन लावला, पण विद्याधरने फोन उचलला नाही.

हॉस्टेल प्रमुखांच्या मदतीने धक्कादायक माहिती समोर

वडिलांना काळजी वाटल्याने त्यांनी हॉस्टेलच्या प्रमुखांना संपर्क साधला. हॉस्टेल प्रमुखांनी वॉचमनला विद्याधरच्या खोलीत डोकावून पाहण्यास सांगितले. वॉचमनने खिडकीतून पाहिले असता, विद्याधर शिंदे हा छताच्या पंख्याला दोरीने गळफास घेतलेल्या अवस्थेत दिसला. हे दृश्य पाहून वॉचमन हादरला.

पोलिसांनी तातडीने केली कारवाई

ही धक्कादायक माहिती मिळताच हॉस्टेल प्रमुखांनी पोलिसांना कळवले. तालुका पोलीस ठाण्यातील फौजदार महेश घोडके आणि त्यांच्या पथकाने तातडीने कॉलेजमध्ये धाव घेतली. त्यांनी रूमचा दरवाजा तोडला असता, विद्याधर शिंदेचा मृतदेह पंख्याला लटकलेल्या अवस्थेत आढळला. पोलिसांनी घटनास्थळाचा पंचनामा केला आणि मृतदेह शवविच्छेदनासाठी शासकीय रुग्णालयात पाठवला.

अमावस्येच्या रात्री एकटाच होता विद्याधर

विद्याधर शिंदे हा ऑर्किड कॉलेजमध्ये इंजिनिअरिंगच्या दुसऱ्या वर्षात शिकत होता. तो हॉस्टेलच्या रूम नंबर 408 मध्ये इतर तीन विद्यार्थ्यांसोबत राहत होता. मात्र, अमावस्येच्या दिवशी इतर तिन्ही मित्र गावी गेले होते. त्यामुळे विद्याधर हॉस्टेलमध्ये एकटाच होता. तो स्वतः देखील शुक्रवारी गावी जाणार होता.

कुटुंबीयांवर दुःखाचा डोंगर

विद्याधर शिंदे याच्या पश्चात आई-वडील आणि एक भाऊ असा परिवार आहे. त्याचे वडील प्रकाश शिंदे हे प्राथमिक शिक्षक आहेत. या घटनेची नोंद तालुका पोलिसात झाली असून आत्महत्येचे नेमके कारण अद्याप स्पष्ट झालेलं नाही. फौजदार महेश घोडके या घटनेचा पुढील तपास करत आहेत.