सुधीर पाटील, सातारा: महाराष्ट्राचे नंदनवन समजल्या जाणाऱ्या पर्यटनस्थळ पाचगणीमध्ये पुन्हा एकदा ड्रग्स तस्करीचा मोठा धक्का बसला आहे. साताऱ्यातील पाचगणी पोलिस आणि स्थानिक गुन्हे शाखेच्या संयुक्त कारवाईत ५ लाखांच्या कोकेनसह १० तस्कर ताब्यात आले. या कारवाईत पोलिसांनी स्कोडा, एमजी हेक्टर कार, मोबाईलसह ४२ लाख ८५ हजार रुपये किंमतीचा मुद्देमाल जप्त केला आहे, ज्यामुळे स्थानिक नागरिक आणि पर्यटकांमध्ये खळबळ माजली आहे.
साताऱ्यातील जावळी तालुक्यातील सावरी गावात अलीकडेच एमडी ड्रग्जची फॅक्टरी उध्वस्त करण्यात आली होती. त्यानंतरच पाचगणीत कोकेन विक्री करणारे रॅकेट पोलिसांच्या हाती लागल्याचे समोर आले आहे. या कारवाईत ताब्यात घेतलेले संशयित मुंबईतील रेकॉर्डवरचे गुन्हेगार असून, त्यांच्यात महंमद नावेद सलिम परमार (रा. भेंडी बाजार, मुंबई), सोहेल हशद खान (रा. पी.बी. मार्ग, मुंबई), महंमद रिजवान अन्सारी, वासिल हमीद खान, अली अजगर सादिक राजकोटवाला (रा. नागपाडा, मुंबई), महंमद साहिल अन्सारी (रा. शिलाजी टॉवर, मुंबई सेन्ट्रल), जिशान इरफान शेख (रा. भायखळा, मुंबई), सैफ अली कुरेशी (रा. मज्जीद गल्ली, मुंबई), महंमद उबेद सिद्दिकी (रा. भेंडीबजार, मुंबई) आणि राहिद मुख्तार शेख (रा. ग्रॅन्ट रोड, मुंबई) यांचा समावेश आहे.
Pimpri Chinchwad Local Politics: मलाच मिळणार उमेदवारी! भाजपमध्ये जावई-सासऱ्यांत तिकीट युद्ध; फडणवीसांच्या शब्दाचा दावा
सातारा पोलिसांनी सांगितले की, पाचगणीतील हे रॅकेट मुंबईशी जोडलेले असून, ते मुंबईतून ही ड्रग्स विक्री करत होते. गेल्या काही महिन्यांत साताऱ्यात ड्रग्स तस्करी प्रकरणं वाढल्याने, पर्यटनस्थळ म्हणून ओळखल्या जाणाऱ्या पाचगणीमध्ये नागरिकांच्या सुरक्षेचा प्रश्नही उपस्थित होतो आहे.
स्थानिक पोलिसांनी पुढे सांगितले की, जप्त केलेला मुद्देमाल मोठ्या प्रमाणावर विकला जात होता. हा प्रकार साताऱ्यातील पर्यटन व स्थानिक समाजासाठी धक्कादायक ठरला आहे. या प्रकरणी पुढील तपास सातारा स्थानिक गुन्हे शाखा आणि पाचगणी पोलिस पुढे नेणार आहेत, तसेच मुंबईशी या रॅकेटच्या कनेक्शनचा सखोल अभ्यास केला जाणार आहे.
या कारवाईमुळे पाचगणी आणि साताऱ्यातील ड्रग्स तस्करीवर पोलिसांची काटेकोर नजर दिसून आली असून, भविष्यात अशा प्रकारच्या रॅकेट्सवर कडक कारवाई करण्यात येणार असल्याचं पोलिसांनी स्पष्ट केलं आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा