मिळालेल्या माहितीनुसार, बारामती तालुक्यात माळेगाव पोलीस स्टेशन हद्दीत ही घटना घडली. एका अल्पवयीन मुलीचे अपहरण झाल्याची माहिती मिळताच माळेगाव पोलिसांनी तातडीने कारवाई केली. मुलीच्या आईने दिलेल्या तक्रारीवरून 4 डिसेंबर रोजी गुन्हा दाखल करण्यात आला होता.

घटनेचे गांभीर्य ओळखून माळेगाव पोलीस स्टेशनचे प्रभारी अधिकारी सहायक पोलीस निरीक्षक सचिन लोखंडे यांनी एक विशेष तपास पथक नेमले होते. या पथकात पोलीस उपनिरीक्षक तुषार भोर, सहायक फौजदार संजय मोहिते, पोलीस कॉन्स्टेबल अमोल वाघमारे आणि जयसिंग कचरे यांचा समावेश होता. तपासादरम्यान, तांत्रिक विश्लेषणातून आरोपीने अल्पवयीन मुलीला बीड येथे नेल्याचं स्पष्ट झालं. त्यानुसार, पोलिसांचे पथक बीडला रवाना झालं आणि त्यांनी आरोपी स्वप्निल उर्फ सोपान विश्वंबर पवार याला अल्पवयीन मुलीसह ताब्यात घेतलं.

पोलिसांच्या तपासात असं उघड झाले की, आरोपी स्वप्निलने अल्पवयीन मुलीला लग्नाचे नाटक करून तिच्याशी गैरवर्तन केले. त्यामुळे या गुन्ह्यात बालकांचे लैंगिक अपराधांपासून संरक्षण कायद्यानुसार (POCSO) अतिरिक्त कलमे वाढवण्यात आली आहेत.

दरम्यान, अपहृत अल्पवयीन मुलीला तिच्या आईच्या ताब्यात सुरक्षितपणे सोपवण्यात आलं असून या प्रकरणाचा पुढील तपास पोलीस उपनिरीक्षक तुषार भोर करत आहेत. संपूर्ण कारवाई सहायक पोलीस निरीक्षक सचिन लोखंडे यांच्या मार्गदर्शनाखाली सुरू असल्याची माहिती पोलिसांनी दिली आहे.