याबाबतची सविस्तर माहिती अशी की, 27 नोव्हेंबर रोजी सायंकाळी नांदेडमधील जुनागंज भागात सक्षम ताटे याचा खून करण्यात आला होता. प्रेम प्रकरणातून मुलीचे वडील गजानन मामीलवाड, भाऊ सोहेल मामीलवाड, भाऊ हिमेश मामीलवाड यांच्यासह इतर आरोपींनी त्याचा गोळ्या झाडून आणि डोक्यात फरशी घालून खून करण्यात आला होता. त्यानंतर दुसऱ्या दिवशी प्रेयसी आचल हिने मयताच्या घरी जाऊन मृतदेहासमोरच हळद आणि कुंकू लावून घेऊन मृतदेहासोबत लग्न केले. या घटनेने राज्यभर खळबळ उडाली. विशेष म्हणजे आरोपी आणि मयत हे सराईत गुन्हेगार असून त्यांच्यावर अनेक गुन्हे दाखल आहे.

इन्स्टावर ओळख अन् नंतर…

आचल मामीलवाड हिचे सक्षम ताटेसोबत मागील तीन वर्षांपासून प्रेमसंबंध होते. सुरुवातीला इंस्टाग्रामवर दोघांची ओळख झाली, त्यानंतर त्याने तिच्या वडील आणि मुलीच्या भावासोबत ओळख निर्माण केली. घरी देखील येणं-जाणं वाढलं. आचल हिचं बीएससी प्रथम वर्षात शिक्षण सुरू होतं, मी अधिकारी व्हावं, असं त्याचं स्वप्न होतं आणि तो मला शिक्षणासाठी मदत करायचा. माझ्याकडे लक्ष दे मी, तुला सोडून कुठेही सोडून जाणार नाही, असं तो नेहमी म्हणत होता. आता तो जगात नाही, पण मी त्याच स्वप्न पूर्ण करणार असल्याचं आचल मामीलवाड हिने सांगितलं आहे.

आरोपींना फाशीची शिक्षा देण्याची मागणी

सक्षम ताटे याची निर्घृण हत्या करण्यात आल्यानंतर ताटे कुटुंबाने मोठा आक्रोश केला. तसंच ताटे कुटुंबासह प्रेयसी असलेल्या आचलनेही सक्षमची हत्या करणाऱ्या आरोपींना फाशीची शिक्षा व्हावी, अशी मागणी केली आहे.