धाराशिव जिल्ह्यातील भूम तालुक्यातील वालवड गावी मूळ असलेल्या दीपाली पाटोळे आणि तिचे पती सचिन हे दोन मुलांसह पुलाची शिरोली येथे भाड्याने राहतात. अठराविश्व दारिद्र्य असलेल्या या कुटुंबातील दीपाली तिसऱ्या अपत्यासाठी आतूर असताना 13 नोव्हेंबर रोजी रात्री घरी चक्कर येऊन पडल्या. तात्काळ सीपीआरच्या मेडिसिन विभागात दाखल केल्यावर डॉ. बुद्धीराज पाटील यांनी तपासणी केली. निदान नसल्याने रेडिओलॉजी विभागात पाठविले, जिथे डॉ. स्वेनिल शहा यांच्या एमआरआय तपासणीत मेंदूत रक्तस्राव असल्याचे स्पष्ट झाले.

जोखमीच्या दुहेरी शस्त्रक्रियेचे यश
मेंदूतज्ज्ञ डॉ. निशांत गब्बूर यांनी रक्तस्राव काढण्यासाठी शस्त्रक्रिया सुचवली. पण नऊ महिन्यांची गर्भावस्थेत ही जोखमीची होती. प्रसूती तज्ज्ञ डॉ. ज्योत्स्ना देशमुख आणि डॉ. रणजित कदम यांनी सोनोग्राफी करून बाळाच्या गळ्याभोवती नाळ गुंडाळल्याचे निदान करून सिझेरियनचा सल्ला दिला. वैद्यकीय पथकाने दीपालीला धीर देत प्रथम सिझेरियन केली, ज्यातून निरोगी बाळ जन्माला आले. लगेच डॉ. गब्बूर यांनी मेंदू शस्त्रक्रिया यशस्वी केली. मेडिसिन विभाग प्रमुख डॉ. अनिता परितेकर, बालरोग प्रमुख डॉ. संगीता कुंभोजकर, भूलतज्ज्ञ डॉ. दीपलक्ष्मी आणि डॉ. मंगेश शिंदे यांच्यासह सहा विभागांतून 15 डॉक्टरांनी हे दिव्य पार पाडले. अधिष्ठाता डॉ. सदानंद भिसे आणि वैद्यकीय अधीक्षक डॉ. भूषण मिरजे यांचे यावेळी मार्गदर्शन लाभले.

आईच्या निधनाची आठवण व कृतज्ञता
15 नोव्हेंबर 2001 रोजी जन्मलेल्या दीपालीच्या आईचे त्या दिवशीच निधन झाले होते. आईविना वाढलेल्या दीपालीला आता स्वतःच्या बाळाला आईविना न सोडण्याची जिद्द होती. डिस्चार्जनंतर पत्रकारांशी बोलताना डोळे पाणावलेल्या दीपाली म्हणाल्या, ‘माझे बरेवाईट झाले असते तर बाळाला माझ्यासारखे होईल. सीपीआरमुळे आम्ही जिवंत आहोत. खासगीत सात-आठ लाखांचा खर्च आला असता, पण इथे मोफत उपचार झाले.’

दरम्यान, राज्याचे आरोग्यमंत्री आणि कोल्हापूरचे पालकमंत्री प्रकाश आबिटकर यांनी पथकाचा सत्कार केला आहे. कोल्हापूरसह परिसरातून याबाबत डॉक्टर आणि सीपीआरवर कौतुकाचा वर्षाव होत आहे.