राज्यात महापालिका निवडणुकांचे पडघम वाजू लागले असून कोणत्याही क्षणी त्याच्या तारखा जाहीर होणार आहे. त्यामुळे महापालिकांची आदर्श आचारसंहिता लागू होण्यापूर्वीच मतदारांवर सोन्या-चांदीच्या पारितोषिकांची लयलूट करणारे जाहीर कार्यक्रम आयोजित करण्यात आले आहेत. या माध्यमातून इच्छुक उमेदवारांची प्रभाग बांधणी सुरू झाली आहे.

बाप रे बाप, ठाणे सिव्हिल रुग्णालयात साप; रुग्ण, डॉक्टर, नर्सेसची पळापळ, घटनेचा VIDEO समोर
राज्यातील नगर परिषदांच्या निवडणुकांचे मतदान २ डिसेंबर रोजी होणार असून त्यासाठीचा जोरदार प्रचार नगर परिषदांच्या परिसरात होत आहेत. या निवडणूकानंतर महापालिका निवडणुका जाहीर होण्याची शक्यता असल्याने इच्छुकांकडून जोरदार मोर्चेबांधणी सुरू करण्यात आली आहे. महापालिका प्रशासनाकडून प्रभाग रचना, मतदारयाद्या आणि आरक्षण सोडत जाहीर होत असताना इच्छुकांकडून मात्र पारितोषिकांची लकी ड्रॉ सोडत काढल्या जात आहेत.

निवडणुकीसाठी आचारसंहिता लागू होण्यापूर्वीच मतदारांसाठी विविध स्पर्धांच्या माध्यमातून लाखोंच्या पारितोषिकांचे वाटप करण्याचा प्रयत्न या कार्यक्रमांतून होत आहे. ठाणे शहरातील वेगवेगळ्या भागांमध्ये अशा कार्यक्रमांची रेलचेल सुरू आहे. महिला मतदारांना आकर्षित करण्यासाठी ‘होम मिनिस्टर’ आणि ‘लकी ड्रॉ’चे विशेष आयोजन करण्यात येत आहे. तर गौतमी पाटील हिच्या नृत्याच्या कार्यक्रमांतून तरुण आणि पुरूष मतदारांना खेचण्याचा प्रयत्न केला जात आहे. यामध्ये हास्यकलाकारांकडून मनोरंजनाचा तडका देण्यात येत आहे. पारितोषिकांच्या ओढीने आलेल्यांची गर्दी कार्यक्रमांच्या शेवटपर्यंत राहिल्याने या निमित्ताने मतदारांपर्यंत इच्छुकांना आपले चेहरे पोहचवण्याचा प्रयत्न सफल होत आहे.
Kalyan Dombivli: भाजपचा स्वबळाचा नारा? प्रदेशाध्यक्ष रवींद्र चव्हाणांचा कल्याणबाबत सूचक इशारा
शासकीय उपक्रमांचेही सोहळे
महाराष्ट्र शासन मुख्यमंत्री रोजगार निर्मिती कार्यक्रमांच्या माध्यमतून व्यावसायासाठी फिरती विक्री केंद्र उपलब्ध करून देणे, ई-वाहने देण्यासारख्या सरकारी कार्यक्रमातही इच्छुक उमेदवारांकडून हजेरी लावली जात आहे. महापालिकांच्या समाजकल्याण विभागाकडून राबवण्यात येणाऱ्या योजनांसाठीची अर्ज भरण्याचेही सुरुवात झाली आहे. अर्ज भरून घेऊन निवडणुकांपूर्वी नागरिकांना थेट आर्थिक सहाय्य खात्यामध्ये देण्याच्या दृष्टीनेही राजकीय नेत्यांकडून प्रयत्न सुरू झाले आहेत.

पैठणी, टीव्ही, मिक्सरचे वाटप
सोन्याची नथ, चांदीचे नाणे, डिनर सेट, स्कूटी, एलईडी टीव्ही, गॅस शेगडी, मिक्सर, कूलर, टेबल पंखा, इस्त्री आणि होम अप्लायन्सेसची पारितोषिके कार्यक्रमात वाटून मतदारांना जोडून ठेवण्याचे प्रयत्न सुरू आहेत. याशिवाय पाककला स्पर्धा, खेळ पैठणीचा यांसारख्या कार्यक्रमातून साड्यांचेही वाटप केले जाते. तसेच क्रिकेटचे सामन्यांच्या माध्यमातून लाखो रुपयांची पारितोषिकेही दिली जात आहे.

वाढदिवसांच्या निमित्ताने ‘भेटवस्तू’
इच्छुक उमेदवारांच्या वाढदिवसांच्या निमित्ताने सामाजिक उपक्रमांच्या नावाने मोफत वस्तूवाटप केले जात आहे. रिक्षाचालकांना मोफत सीएनजी, गृहपयोगी साहित्य, ब्लँकेट, महिलांना साड्या अशा ‘भेटवस्तू’ पोहचवण्यात येत आहेत. गेल्या दोन ते तीन महिन्यांपासून आणि पुढील काही दिवसांमध्येही वाढदिवसांच्या ‘भेटीं’ मधून मतदारांपर्यंत पोहोचण्याचा प्रयत्न केला जात आहे.