पुण्याच्या नारायण पेठेत रात्री उशिरा एक तरुण आणि त्याच्यासोबत असलेल्या तरुणीने भरधाव वेगात कार चालवत रस्त्याच्या कडेला पार्क केलेल्या काही वाहनांना धडक दिली. या तरुणाने वाहनांना धडक देत मोठी तोडफोड केल्याची माहिती स्थानिकांनी दिली आहे. या अपघातानंतर नागरिकांनी त्या तरुणाला गाडीच्या खाली उतरवून जाब विचारण्याचा प्रयत्न केला असता तो मद्यधुंद अवस्थेत असल्याचं दिसून आले. त्याने दारूच्या नशेत स्वतःला पोलिस अधिकाऱ्याचा मुलगा असल्याचा धाक दाखवत आरडाओरडा करण्यास सुरुवात केली. त्यामुळे रस्त्यावरच्या वाद आणखीचं वाढत गेला. लोकांची गर्दी जमा झाली.

काही प्रत्यक्षदर्शीच्या मते, या कारमध्ये चौघेजण होते. यामध्ये दोन तरुण आणि दोन तरुणींचा समावेश आहे. चौघेजण मद्यधुंद अवस्थेत होते, असं सांगितलं जात आहे. या तरुणांच्या कारने अपंग व्यक्तीस जोरदार धडक दिल्याचीही माहिती प्रत्यक्षदर्शीनी दिली. या दरम्यान हे चौघेजण नेमकं कुठले याबाबत नेमकी माहिती मिळू शकलेली नाही. सध्या पोलिसांनी या प्रकरणाची नोंद केली असून पोलिसांकडून तपास केला जात आहे.

सुदैवाने या प्रकारात कोणत्याही व्यक्तीला मोठी दुखापत झाली नाही. मात्र पार्क केलेल्या अनेक वाहनांचे मोठे नुकसान झाले असून रहिवाशांनी संताप व्यक्त केला.

दरम्यान, विश्रामबाग पोलीस घटनास्थळी तातडीने दाखल झाले. दोन्ही बाजूंच्या तक्रारी नोंदवून घेत पोलिसांनी परिस्थिती शांत केली. पुढील तपास सुरू असून, नियमभंग करणाऱ्यांवर कठोर कारवाई केली जाणार असल्याची माहिती पोलीस अधिकाऱ्यांनी दिली आहे.

या घटनेने मात्र, पुण्याच्या पोर्शे प्रकरणाच्या भयंकर आठवणी जाग्या केल्या आहेत. जर, या तरुणाच्या गाडीपुढे कोणी आलं असतं, तर पोर्शे केससारखी भीषण घटना घडू शकली असती, अशीही चर्चा सध्या पुण्यात सुरु आहे.