कोल्हापुरात अंधश्रद्धा आणि भोंदूगिरीचा धक्कादायक प्रकार समोर आला आहे. एका चुटकीवाला बाबाचे व्हिडीओ सोशल मीडियावर व्हायरल झाल्यामुळे संताप व्यक्त केला जात आहे. या चुटकीवाला बाबाचा शोध आता पोलीस घेत आहेत.
करणी, वशीकरणाचे व्हिडीओ व्हायरल
‘चुटकीवाला बाबा’चे सहा व्हिडिओ सध्या सोशल मीडियावर चांगलेच व्हायरल झाले आहेत. एका व्हिडिओत तो जमिनीवर बसलेल्या व्यक्तीच्या कपाळावर हात ठेवून काही मंत्रोच्चार करताना दिसतो; दुसऱ्यात मानवी कवटीचा आधार घेत काही विधी करत असल्याची दृष्ये आहेत. तिसऱ्या आणि चौथ्या व्हिडिओत तो स्त्रिया आणि तरुणींवर चिमट्यासारख्या साधनाने स्पर्श करत अघोरी तंत्रविधी करतो आहे. एका दृश्यात त्रिशूल हातात घेऊन काही जप करताना दिसतो. तसेच या व्हिडिओंनी कोल्हापुरात आणि परिसरात खळबळ उडाली आहे.
कठोर कारवाईची अंनिसची मागणी
अंधश्रद्धा निर्मूलन समितीच्या गीता हसुरकर यांनी सांगितले की, अशा भोंदू बाबांचा प्रभाव निरपराध मुलं, महिला आणि सामान्य नागरिकांवर पडतो. त्यांच्या मानसिक तसेच आर्थिक शोषणाचा हा प्रकार असून याविरोधात कडक कायदेशीर कारवाई होणे आवश्यक आहे. नागरिकांनी अशा भोंदूगिरीपासून दूर राहून संशयास्पद बाबी तात्काळ पोलिसांना किंवा समितीला कळवाव्यात, असे त्यांनी आवाहन केले आहे.
पोलीस घेत आहेत बाबाचा शोध
दरम्यान, जुना राजवाडा पोलीस ठाण्याचे पोलीस निरीक्षक संजीवकुमार झाडे यांनी सांगितले की, “या प्रकरणी अद्याप कोणतीही औपचारिक तक्रार आली नसली, तरी व्हिडिओंच्या आधारे चौकशी सुरू केली आहे. सध्या तो बाबा कोल्हापूरबाहेर असल्याचे प्राथमिक तपासात समोर आले असून लवकरच त्याचा नवा ठावठिकाणा शोधला जाईल.” तसेच “या बाबाने कुणाची जर आर्थिक किंवा अन्य फसवणूक केली असेल तर पुढे येऊन याबाबत नागरिकांनी पोलिसांना कळवावे,” असे आवाहन देखील झाडे यांनी केले आहे.
मुंबईहून वाराणसी निघालेल्या विमानाची इमर्जन्सी लँडिंग, 5 विमानतळांना बॉम्बने उडवून देण्याची धमकी
निवडणुकांच्या पार्श्वभूमीवर वाढती भोंदूगिरी
स्थानिक स्वराज्य संस्थांच्या निवडणुकांच्या पार्श्वभूमीवर भोंदूगिरीच्या अशा घटना वाढत असल्याचे पाहायला मिळत आहे. उमेदवारांच्या नावावर करणी, लिंबू कापणे, खिळे मारणे अशा प्रथा समाजात भीतीचे वातावरण निर्माण करत आहेत. प्रशासन आणि समाजाने एकत्र येऊन या प्रकारांना आळा घालणे अत्यंत आवश्यक झाले आहे. आतली बातमी! शिंदे VS ठाकरे, सुप्रीम कोर्टात आज काय-काय घडलं?
दरम्यान, ‘चुटकीवाला बाबा’ प्रकरणाने कोल्हापुरातील भोंदूगिरी आणि अंधश्रद्धेच्या वाढत्या प्रवाहाची गंभीर झलक पुन्हा एकदा दाखवून दिली आहे. जनजागृती, कठोर कायदेशीर उपाय आणि सामाजिक सहभाग या तिन्ही साधनांतूनच अशा अंधश्रद्धेचा कायमस्वरूपी बंदोबस्त होऊ शकतो, हे या घटनेने अधोरेखित झाले आहे.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा