ठाणे (पश्चिम) येथील उपवन तलावाजवळ, पालई देवी मंदिराच्या परिसरात ही घटना घडली. हा तलाव नागरिकांमध्ये फिरण्यासाठी खूप प्रसिद्ध आहे. येथे रविवारी तर बरेच नागरिक फेरफटका मारण्यासाठी येतात. आपत्कालीन व्यवस्थापन कक्षाने दिलेल्या माहितीनुसार, मुख्य अग्निशमन नियंत्रण कक्षाने त्यांना रविवारी रात्री एक व्यक्ती तलावात बुडत असल्याची माहिती दिली. मृत व्यक्तीची ओळख अनिल फकीरराव दावसे (58) अशी पटली असून ते भिम नगर, वर्तक नगर, ठाणे येथे राहत होते.

Thane Crime News : व्यापारी पती कायम बाहेर असायचा, विवाहितेचे सोसायटीतील व्यक्तीसोबत प्रेमसंबंध जुळले, शुक्रवारी रात्री दोघांनी… काय घडलं?

पाण्यातून बाहेर काढले पण…

घटनेची माहिती मिळताच वर्तक नगर पोलीस स्टेशन आणि अग्निशमन दलाच्या टीम घटनास्थळी दाखल झाल्या. त्यांच्यासोबत एक फायर इंजिन आणि एक रुग्णवाहिकाही होती. अग्निशमन दलाच्या जवानांनी अनिल दावसे यांना पाण्यातून बाहेर काढले. त्यानंतर त्यांना छत्रपती शिवाजी महाराज रुग्णालयात नेण्यात आले. मात्र, डॉक्टरांनी त्यांना तपासाअंती मृत घोषित केले.

घटनेचा व्हिडीयो सोशल मीडियावर

पोलिसांनी या घटनेचा पुढील तपास सुरू केला आहे. अनिल दावसे यांचा मृत्यू कसा झाला, यामागील नेमकी कारणे शोधण्याचा पोलीस प्रयत्न करत आहेत. प्राथमिक तपासानुसार ही घटना अपघाती मृत्यू असल्याचे समजून येत आहे. या घटनेचा व्हिडियो सोशल मीडियावर व्हायरळ झाला असून त्यात अग्निशमन दल त्या व्यक्तीला वाचवण्यासाठी बचावकार्य करताना दिसून येत आहे.

या तलावात नेहमीच नागरिकांची वर्दळ असते. रविवारच्या दिवशी तर ही गर्दी आणखीनच पाहायला मिळते. परंतु, आता उपवन तलावात अशा घटनांचे प्रमाण वाढले असून, परिसरात चिंता व्यक्त केली जात आहे. त्याचबरोबर सुरक्षा व्यवस्थेवरसुद्धा प्रश्नचिन्ह उपस्थित केले जात आहे.