मिळालेल्या माहितीनुसार, कोंढवा खुर्द येथील या सोसायटीने रमजान महिन्यात सायंकाळी साडेसहा ते रात्री साडेदडा या वेळेत ॲरोबिक्स खोलीत नमाज पठणास परवानगी देण्याचा ठराव विशेष सर्वसाधारण सभेत केला होता. परंतु, सोसायटीच्या उपविधीत क्लब हाउस किंवा कॉमन हॉलसारख्या सामाईक जागा कोणत्याही व्यक्तीला भाडेतत्त्वावर द्यायला मनाई असल्याचं सांगून पुण्याच्या सहकार न्यायालयाकडून या ठरावाला तात्पुरती स्थगिती देण्यात आली होती. पण, सोसायटीने बहुमताने निर्णय घेतला असून हा निर्णय जागा भाडेतत्त्वावर देण्याबाबतचा नसल्यामुळे तो नियमावलीच्या विरोधात नाही. त्यामुळे सोसायटीचा ठराव बेकायदा नाही, असं स्पष्ट करत सहकार अपीलीय न्यायालयाने पुण्याच्या सहकार न्यायालयाचा अंतरिम आदेश रद्दबातल ठरवला आहे. तसंच मूळ वादाच्या सुनावणीला गती देऊन जून 2026 पर्यंत निकाल देण्याचा आदेशही दिला.

दरम्यान, रमजानप्रमाणेच गणेशोत्सव, नवरात्रोत्सव असे सर्व सण साजरे करण्यासाठी सर्वधर्मीय सभासद हा कक्ष वापरत असतात. सोसायटीच्या सर्वसाधारण सभेत लोकशाही पद्धतीने कायदेशीर दृष्टिकोनातून हा निर्णय घेतला आहे. त्यामागे सोसायटीत आध्यात्मिक व मैत्रीपूर्ण वातावरण जपण्याचा उद्देश आहे, असं सोसायटीच्या अध्यक्षांनी ‘मटा’शी बोलताना सांगितलं.

काय आहे प्रकरण?

कोंढव्यातील या सोसायटीत एकूण 352 सभासद आहेत. या सोसायटीने विशेष सर्वसाधारण सभेत रमजानच्या महिन्यात सायंकाळी साडेसहा ते रात्री साडेदडा या वेळेत अॅरोबिक्स खोलीत नमाजपठणाला परवानगी देण्याबाबतचा ठराव बहुमताने केला होता. परंतु, सोसायटीपासून मशीद पाच मिनिटांच्या अंतरावर असताना, अॅरोबिक्स खोलीचा वापर मूळ उद्देशाऐवजी दुसऱ्या कारणासाठी करणं उपविधींचे उल्लंघन असल्याचा दावा करून सोसायटीतील एका मुस्लिम सभासदाने आक्षेप घेऊन पुण्याच्या सहकार न्यायालयात धाव घेतली होती. त्याच्या याचिकेची दखल घेऊन सहकार न्यायालयाकडून सोसायटीच्या ठरावाविरोधात अंतरिम मनाई आदेश दिला गेला. त्याविरोधात सोसायटीने सहकार अपीलीय न्यायालयात धाव घेतली होती. केवळ रमजानच्या महिन्यात चार तासांसाठी अॅरोबिक्सच्या खोलीचा वापर करण्यास सोसायटीने बहुमताच्या ठरावाद्वारे परवानगी दिली असून, उर्वरित 20 तास ती इतर रहिवाशांसाठी खुली असते. हा वापर व्यावसायिक नसून, केवळ एका सदस्याने त्यावर आक्षेप घेतल्याचा युक्तिवाद सोसायटीकडून करण्यात आला होता.