Pune News: पुणे शहरातील फुरसुंगी येथे एक धक्कादायक प्रकार उघडकीस आला आहे. एका अल्पवयीन मुलीला प्रेमाचे आमिष दाखवून, तिचे खाजगी फोटो व्हायरल करण्याची धमकी देत आरोपीने आर्थिक फसवणूक आणि लैंगिक अत्याचार केल्याचं उघड झालं आहे.
मिळालेल्या माहितीनुसार, फुरसुंगीतील अल्पवयीन मुलीशी आरोपीची ओळख सोशल मीडियाच्या माध्यमातून झाली. त्यानंतर त्याने तिला प्रेमाचे आमिष दाखवले आणि लग्नाचे आश्वासन देत तिचा विश्वास संपादन केला. नंतर आरोपीने पीडितेला आपल्या घरी बोलावून तिच्यावर लैंगिक अत्याचार केला. या दरम्यान विकृत तरुणाने तिचे खाजगी फोटो व व्हिडिओ काढले होते. यानंतर आरोपीने सदर फोटो आणि व्हिडिओ व्हायरल करण्याची धमकी देत पीडितेकडून तब्बल 1 लाख 15 हजार रुपये उकळले. मात्र नंतरही आरोपीकडून तिला वारंवार पैशाची मागणी होऊ लागली. अखेर त्याला कंटाळून पीडितेने पैसे देण्यास नकार दिला. त्यामुळे नराधम आरोपीने पीडित तरुणीच्या नावाने बनावट इन्स्टाग्राम आयडी तयार करून, तसंच तिच्या भावाच्या फेसबुक अकाउंटवरून खासगी फोटो आणि व्हिडिओ शेअर केली, अशी माहिती पोलिसांनी दिली आहे.
दरम्यान, पीडितेच्या कुटुंबाला ही समजताच त्यांनी तत्काळ पोलीस ठाण्यात धाव घेतली. फुरसुंगी पोलिसांनी प्राथमिक चौकशीनंतर आरोपीविरुद्ध गंभीर गुन्हा नोंदवून तपास सुरू केला आहे. सध्या आरोपी फरार असून, त्याच्या अटकेसाठी पोलिसांकडून पथकाची नेमणूक करण्यात आली आहे. या गंभीर घटनेनंतर पोलिसांनी युवकांना आणि पालकांना आवाहन केलं आहे. सोशल मीडियावर अपरिचित व्यक्तींशी संवाद साधताना सावधगिरी बाळगावी. अल्पवयीन मुलींशी गैरवर्तन करणाऱ्यांविरोधात कठोर कारवाई करण्यात येईल, असंही पोलिसांनी स्पष्ट केलं आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा