पवईत असलेल्या RA ॲक्टिंग स्टुडिओत दिवसाढवळ्या मुलांना ओलीस ठेवण्यात आलं. रोहित आर्य नावाच्या मुलानं स्टुडिओच्या खोलीत मुलांना डांबून ठेवलं. या स्टुडिओत ॲक्टिंगचे क्लास चालतात. तिथल्याच पहिल्या मजल्यावर अनेक मुलांना ओलीस ठेवण्यात आलं. इमारतीला लावण्यात आलेल्या काचांमधून मुलं खाली वाकून पाहत होती. त्यांचे डोळे भेदरलेले होते. चेहऱ्यावर भीती स्पष्ट दिसत होती. आसपासच्या लोकांची घटनेची माहिती पोलिसांना दिली. पोलिसांनी तातडीनं घटनास्थळ गाठलं.

मुलांना ओलीस ठेवण्यात आल्याचं कळताच त्यांचे पालक, नातेवाईक खाली जमले. त्यांच्या डोळ्यात काळजी होती. चेहऱ्यावर चिंता होती. पहिल्या मजल्याकडे पालक मंडळी डोळे लावून होती. पोलिसांनी घटनास्थळी येत तातडीनं हालचाली सुरु केल्या. दरम्यान मुलांना डांबून ठेवणाऱ्या रोहित आर्यचा एक व्हिडीओ समोर आला. त्यात तो आग लावून देण्याची धमकी देत होता. त्यामुळे पालक घाबरले.

पोलिसांनी मुलांच्या जीवाला असलेला धोका लक्षात घेता सावध पावलं टाकली. त्यांनी मोठ्या शिताफीनं रोहितला ताब्यात घेतलं. रोहित याच स्टुडिओत काम करतो. तो एक यूट्यूब चॅनेलदेखील चालवतो. गेल्या चार ते पाच दिवसांपासून तो इथे ऑडिशन घेत होता. पोलिसांनी दिलेल्या माहितीनुसार, सगळ्या मुलांची सुखरुप सुटका करण्यात आली आहे. आरोपी मानसिकदृष्ट्या अस्थिर आहे का, याचा शोध पोलीस घेत आहेत.

आज सकाळी जवळपास १०० मुलं ऑडिशनला पोहोचली. त्यातील ८० मुलांना रोहितनं जाऊ दिलं. बाकीच्या मुलांना त्यानं ओलीस ठेवलं. ही मुलं खिडकीतून खाली पाहत मदतीसाठी याचना करत होती. तेव्हा खाली असलेल्या लोकांना शंका आली. त्यानंतर हा सगळा प्रकार उघडकीस आला.