Pune Crime: पुणे पोलिसांनी मारणे टोळीचा सदस्य रुपेश मारणे याला अटक केली आहे. अभियंता देवेंद्र जोग यांच्यावरील हल्ल्याप्रकरणी तो ९ महिन्यांपासून फरार होता. कोथरूड पोलिसांनी त्याला मुळशी तालुक्यातील आंदगाव येथून पकडले. गजानन मारणे तुरुंगात असून, रुपेश मारणे टोळीचा कारभार पाहत होता. त्याच्याविरुद्ध गंभीर गुन्हे दाखल आहेत.
शिवजयंतीच्या दिवशी अभियंता देवेंद्र जोग यांच्यावर झालेल्या हल्ल्याच्या प्रकरणात दीर्घकाळ फरार असलेला गजा मारणे टोळीचा सक्रिय सदस्य रुपेश मारणे अखेर पोलिसांच्या हाती लागला आहे. कोथरूड पोलिसांनी सोमवारी रात्री उशिरा मुळशी तालुक्यातील आंदगाव येथून त्याला अटक केली. फेब्रुवारी महिन्यात कोथरूड परिसरात झालेल्या घटनेत देवेंद्र जोग या संगणक अभियंत्यावर काही गुंडांनी हल्ला केला होता. जोग हे भाजपचे कार्यकर्ते असल्याने या प्रकरणाला राजकीय वळण लागले होते. त्यानंतर केंद्रीय मंत्री मुरलीधर मोहोळ यांनी या घटनेचा तीव्र निषेध नोंदवत दोषींवर कठोर कारवाईची मागणी केली होती.
या मारहाणीच्या गुन्ह्यात सहभागी असलेले काही आरोपी आधीच पोलिसांच्या ताब्यात आहेत. मात्र, प्रमुख आरोपी रुपेश मारणे घटना घडल्यानंतर पसार झाला होता. 9 महिन्यापासून पुणे पोलीस हे रुपेश मारण्याच्या शोधात होते. आता पोलिसांच्या पथकाने त्याचा माग काढत अखेर आंदगावमध्ये सापळा रचून त्याला पकडले.
दरम्यान, गजा मारणे सध्या तुरुंगात असून, त्याचा निकटवर्तीय रुपेश मारणे बाहेरून मारणे टोळीचा कारभार पाहत असल्याची माहिती पोलिस तपासात समोर आली होती. कोथरूड पोलिस ठाण्यात त्याच्याविरुद्ध गंभीर गुन्ह्यांची नोंद असून, पुढील चौकशी सुरू आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा