परभणी शहरामध्ये माजी मुख्यमंत्री अशोक चव्हाण यांच्यासह पालकमंत्री मेघना बोर्डीकर यांच्या उपस्थितीत हा पक्षप्रवेश सोहळा संपन्न झाला. मागील वीस वर्षापासून सेलू नगरपालिकेमध्ये आपले निर्विवाद वर्चस्व राखणाऱ्या विनोद बोराडे यांनी आज भाजपमध्ये प्रवेश करून भाजप पक्षाची ताकद चांगलीच वाढवली असल्याचे बोलले जात आहे. विनोद बोराडे हे अशोक चव्हाण यांचे खंदे समर्थक मानले जातात. काँग्रेस पक्षापासूनच विनोद बोराडे हे अशोक चव्हाण यांच्यासोबत खांद्याला खांदा लावून राहिले होते. त्यामुळे ते भाजपमध्ये जातील, अशी बऱ्याच दिवसांपासून चर्चा देखील होती.
दिल्लीवरुन ‘तो’ कॉल अन् CM पद गेलं; आता ‘दुसरे’ एकनाथ रडारवर? फडणवीसांनी दिलेला मेसेज चर्चेतपण आता होणाऱ्या नगरपालिका निवडणुकीच्या अनुषंगाने विनोद बोराडे यांनी सेलू शहरातील शेकडो कार्यकर्त्यांसह भाजपमध्ये प्रवेश केला आहे. त्यामुळे जिंतूर सेलू मतदारसंघात पालकमंत्री मेघना बोर्डीकर यांची आणखी ताकद वाढली असल्याचे बोलले जात आहे. विनोद बोराडे यांच्यासोबतच वालूर येथील संजय साडेगावकर यांनी देखील भाजपमध्ये प्रवेश केला आहे. त्यामुळे जिल्हा परिषदेच्या निवडणुकीत संजय साडेगावकर यांचा फायदा भाजपला होऊ शकतो, अशी अपेक्षा व्यक्त केली जात आहे.

त्याचबरोबर गंगाखेड विधानसभा मतदारसंघाचे आमदार रत्नाकर गुट्टे यांचे खंदे समर्थक मानले जाणारे जिल्हा परिषदेचे माजी सभापती गणेश रोकडे यांनी देखील आपल्या शेकडो समर्थकांसह आज भाजपमध्ये प्रवेश केला आहे. गणेश रोकडे यांची पालम तालुक्यात चांगली ग्रामीण भागात चांगली पकड आहे. गणेश रोकडे यांनी भाजपामध्ये प्रवेश केल्यामुळे आमदार रत्नाकर गुट्टे यांना जोरदार धक्का बसल्याचे बोलले जात आहे. गणेश रोकडे हे सध्या जिल्हा मध्यवर्ती बँकेचे संचालक असून त्याचबरोबर जिल्हा परिषदेमध्ये देखील ते पाच वेळा सभासद राहिले आहेत.

एकंदरीतच मागील काही काळापासून परभणी जिल्ह्यामध्ये भाजपमध्ये मोठ्या प्रमाणावर पक्षप्रवेश होत आहेत. काही दिवसांवर जिल्हा परिषद नगरपालिका पंचायत समिती निवडणुका लागणार आहेत आणि त्या पार्श्वभूमीवर भाजप हा सत्ताधारी पक्ष असल्यामुळे आणि पालकमंत्री या भाजपचा असल्यामुळे मोठ्या प्रमाणावर भारतीय जनता पक्षात विविध पक्षातील कार्यकर्ते प्रवेश करत आहेत.

विकसित महाराष्ट्रासाठी भाजपला साथ – माजी मुख्यमंत्री अशोक चव्हाण

आम्ही जरी पूर्वाश्रमीचे काँग्रेस पक्षाचे असलो तरी 2045 पर्यंत देशाला विकसित राष्ट्र करण्याचा संकल्प घेऊन निघालेल्या पंतप्रधान मोदी आणि 2045 च्या अगोदर विकसित महाराष्ट्र करण्यासाठी प्रयत्न करत असलेल्या मुख्यमंत्री देवेंद्र फडणवीस यांना साथ देण्यासाठी आम्ही भाजपमध्ये प्रवेश केला आहे. येणाऱ्या काळात भाजप पक्ष वाढविण्यासाठी आपण सर्वच प्रयत्न करणार आहोत. विकसित महाराष्ट्र करण्यासाठी देवेंद्र फडणवीस यांचे हात बळकट करणे आवश्यक आहे आणि त्याला साथ देण्यासाठीच येणाऱ्या सर्वच निवडणुकांमध्ये भाजप पक्ष एक नंबरचा राहिला पाहिजे. राज्यासोबत देशात देखील भाजपचे सरकार राहिले पाहिजे, जेणेकरून भारत हा विकसित राष्ट्र होईल, आणि त्या अगोदर महाराष्ट्र हे विकसित राज्य होईल. यासाठीच आपण प्रयत्न करणार असल्याचं माजी मुख्यमंत्री अशोक चव्हाण यावेळी म्हणाले आहेत.