हातकणंगले तालुक्यातील तळसंदे येथील निवासी शिक्षण संस्थेतील एका हॉस्टेलमध्ये विद्यार्थ्यांकडूनच लहान विद्यार्थ्यांना पट्टा, प्लास्टिक बॅट आणि दांडक्याने मारहाण करण्यात आल्याचा धक्कादायक प्रकार समोर आला आहे. यासंबंधित जुने व्हिडिओ सध्या मोठ्या प्रमाणात व्हायरल झाले आहेत. सध्या त्यांच्या सत्यतेची चौकशी सुरू आहे. पालकांमधून याप्रकरणी मोठी चिंता व्यक्त केली जात आहे.

मेट्रो टॉवरचा आम्हाला त्रास होतोय, खिडक्या, दारही उघडू शकत नाही, चर्चगेटच्या रहिवाशांची तक्रार

नुकतीच घडलेली हॉस्टेलमध्ये पहाटेची घटना चर्चेत
6 ऑक्टोबर रोजी पहाटे पाचच्या सुमारास हॉस्टेलमध्ये राहणाऱ्या सिद्धीविनायक सनी मोहिते (वय 16, रा. उचगाव, करवीर) या विद्यार्थ्याला पट्ट्याने, बॅटने व इतर साहित्यासह मारहाण झाली होती. गंभीर अवस्थेत सिद्धीविनायकला उपचारासाठी सीपीआर रुग्णालयात दाखल करण्यात आले. याबाबत वडगाव पोलिसांकडे तक्रार दाखल करण्यात आली आहे. हॉस्टेलचे रेक्टर राहुल कोळी याच्यासह इतर विद्यार्थ्यांविरुद्ध भारतीय दंड विधान तसेच बालकांच्या संरक्षणविषयक कायद्यांतर्गत गुन्हा नोंदवण्यात आला आहे.

या प्रकरणाचा तपास वडगाव पोलिसांनी हाती घेतला आहे. मारहाणीच्या प्रकारानंतर हॉस्टेल प्रशासन किंवा पोलिसांकडून अधिकृत माहिती देण्यात आलेली नाही. व्हायरल व्हिडिओ आणि जखमी झालेल्या विद्यार्थ्याच्या कुटुंबियांनी याप्रकरणाची तक्रार नोंदवल्याने प्रकरण अधिकच गाजू लागले आहे. आरोपी रेक्टर तसेच सहभागी विद्यार्थ्यांविरुद्ध कायदेशीर कारवाईचे संकेत पोलिसांनी दिले आहेत. मात्र याचवेळी आता या शिक्षण संस्थेतील विद्यार्थ्यांकडूनच विद्यार्थ्यांना केला जाणाऱ्या मारहाणीचे जुने व्हिडिओ व्हायरल झाले आहेत.

मनसे स्टाईलने आंदोलनाचा इशारा
व्हायरल होणाऱ्या व्हिडिओमध्ये मारहाण करणाऱ्यांवर रॅगिंगचा गुन्हा दाखल झाला पाहिजे. तसेच कोल्हापुरातील अनधिकृत आणि अधिकृत अशा सर्वच शिक्षण संस्था मधील रॅगिंग संदर्भात एक समिती नेमली जावी, अशी मागणी महाराष्ट्र नवनिर्माण सेनेकडून करण्यात आली आहे. गेल्या दोन महिन्यांपासून या मागणीचा पाठपुरावा करत असल्याचं मनसे विद्यार्थी सेनेचे जिल्हाध्यक्ष अभिजीत राऊत यांनी दिला आहे. कोल्हापुरात अशा अनेक अनधिकृत शिक्षण संस्था असून त्यांची यादी देखील शिक्षण विभागाला देण्यात आली आहे. या संस्था तात्काळ बंद कराव्यात, अशा मागणीचे निवेदन देखील वेळोवेळी दिल्याचे तसेच पुढच्या काही दिवसांत याबाबत कठोर कारवाई न केल्यास महाराष्ट्र नवनिर्माण सेना अधिकाऱ्यांना मनसे स्टाईलने धडा शिकवेल असा इशारा देण्यात आला आहे.

दरम्यान, या घटनेमुळे विद्यार्थ्यांच्या सुरक्षेबद्दल पालकांचा विश्वास ढासळला आहे. व्हायरल व्हिडिओंनी परिसरात संताप व चर्चा सुरू झाली असून, संस्थेतील विद्यार्थ्यांच्या सुरक्षिततेचा प्रश्न ऐरणीवर आला आहे. शिक्षण संस्थांकडून अशा घटनांना आळा घालण्याची मागणी जोर धरू लागली आहे.