पुणे रेल्वे स्टेशनवरून रोज 150 पेक्षा जास्त ट्रेन धावतात. पुण्यातून रोज 1.75 अर्थात पावणे दोन लाख प्रवासी प्रवास करतात. त्यामुळे एकाच पुणे स्थानकांत होणारी गर्दी कमी करण्यासाठी रेल्वे प्रशासनाकडून खडकी आणि हडपसर टर्मिनलचा पर्याय शोधून या दोन स्थानकांचा विकास केला जात आहे. हडपसर रेल्वे स्थानकावर चार प्लॅटफॉर्म असतील, तर खडकी स्थानकांत तीन प्लॅटफॉर्म तयार करण्यात आले आहे. या दोन टर्मिनलचं काम पूर्ण करण्यासाठी डिसेंबर 2025 ची डेटलाइन देण्यात आली आहे. ही तारीख आता जवळ आली असून दोन्ही टर्मिनलची बरीचशी कामं झाली आहेत.
Pune News : पुण्यात वाहतूक कोंडी सोडवण्यासाठी मोठा प्लॅन, चाकणसह अनेक रस्ते एकमेकांना जोडणार; कसे असतील मार्ग?
प्रवाशांसाठी आवश्यक असलेली कामं प्रगतीपथावर आहेत. नव्या प्लॅटफॉर्मची मुख्य मार्गाला जोडणी पूर्ण झाली आहे. त्यानंतर आता रेल्वे प्रशासनाने खडकी आणि खडपसर टर्मिनलमधून दिवाळी आणि छटसाठीच्या विशेष रेल्वे, ट्रेन सोडण्याची योजना आखली आहे. त्यामुळेच या दोन्ही टर्मिनलची आता चाचणी होणार आहे. या चाचण्यांमध्ये काही समस्या, त्रुटी आढळून आल्या तर त्या त्रुटींवर पुढील काही महिन्यांत काम करणं शक्य होणार आहे. त्यानंतर पुढे डिसेंबरनंतर पूर्ण क्षमतेने ही दोन्ही टर्मिनल सुरू करता येतील.

रेल्वे प्रशासनाकडून पुण्यातून दिवाळी आणि छटपूजा या सणांसाठी विशेष रेल्वे २५ सप्टेंबरपासून सोडण्यास सुरुवात केली आहे. जवळपास 30 नोव्हेंबरपर्यंत या विशेष गाड्या चालवण्यात येणार आहेत. सणाच्या काळात पुण्यातून, पुणे रेल्वे विभागाकडून 26 ठिकाणी विशेष गाड्या चालवल्या जाणार आहेत. या गाड्यांच्या एकूण 1000 फेऱ्या असतील. पाच शहरांसाठी हडपसर टर्मिनल येथून ट्रेन सुटणार आहेत. या ट्रेनच्या जाऊन – येऊन एकूण 138 फेऱ्या असतील. तर, खडकी येथून दोन शहरांसाठी ट्रेन सुटतील. खडकी येथून येऊन – जाऊन अशा 28 फेऱ्या होतील. तर, पुणे रेल्वे स्थानकावरून इतर सर्व विशेष ट्रेन सुटतील. खडकी आणि हडपसर या दोन स्थानकांवरून जवळपास 175 फेऱ्या सुटणार असल्याने पुणे रेल्वे स्टेशनवरील ताण कमी होणार आहे.