बाळासाहेब ठाकरे यांच्या निधनाला जवळपास १३ वर्ष उलटलेली आहे. मग त्यांच्या निधनानंतर पार्थिव २ दिवस मातोश्रीवर का ठेवण्यात आलं, याचा उल्लेख आताच का केला, असा प्रश्न रामदास कदम यांना विचारण्यात आला. त्यावर कदम यांनी बाळासाहेब ठाकरे हृयात असताना आणि हृयात नसताना आपल्याला पक्षात नसलेली वागणूक याकडे लक्ष वेधलं. यावेळी त्यांनी काही महत्त्वाचे किस्से सांगितले. बोलण्याच्या ओघात रामदास कदम यांनी अनेक गोष्टी सांगितल्या.

बाळासाहेब ठाकरे हृयात असताना दसरा मेळाव्यात माझं भाषण व्हायचं. बाळासाहेब ठाकरे हृयात असताना ते मला मेळाव्यात बोलण्याची संधी द्यायचे. पण बाळासाहेब ठाकरे गेले आणि उद्धव ठाकरेंनी वक्त्यांच्या यादीतून आपलं नाव वगळलं. उद्धव ठाकरेंनी असं का केलं, मला का बोलू दिलं नाही, असा प्रश्न रामदास कदम यांनी विचारला.

बाळासाहेब ठाकरे हृयात असताना पक्षाच्या व्यासपीठावर मला पहिल्या रांगेत स्थान असायचं. साहेबांनी कायम माझा सन्मान केला. पण साहेबांचं निधन झाल्यावर मला व्यासपीठावर कोणत्या रांगेत स्थान देण्यात आलं? मागच्या रांगेतील खुर्चीवर माझं नाव लिहिण्यात यायचं, अशी खदखद कदम यांनी बोलून दाखवली.

बाळासाहेबांच्या निधनानंतर २०१४ मध्ये उद्धव ठाकरेंनी तुम्हाला मंत्रिपद दिलं, याची आठवण पत्रकारांनी कदम यांनी करुन दाखवली. त्यावर लोक हसतील म्हणून त्यावेळी उद्धव ठाकरेंनी मला मंत्री केलं. पण खातं कोणतं दिलं? पर्यावरण मंत्रालय. त्यांचा नाईलाज होता, म्हणून मला मंत्री केलं, असं कदम म्हणाले.

दिवाकर रावते आणि मी पक्षात ज्येष्ठ होतो. मग आम्हाला २०१९ मध्ये मंत्रीपदं का दिली नाहीत? उद्धव ठाकरे मुख्यमंत्री झाले. पण रावते आणि मला डावललं. उद्धव ठाकरेंनी अगदी अपक्षांना मंत्रीपदं दिली. त्यांच्यासाठी हेलिकॉप्टर्स पाठवली. त्या नेत्यांचं काय योगदान होतं शिवसेना वाढवण्यात, असा सवाल कदम यांनी विचारला.