मनसेतून बडतर्फ झालेले वैभव खेडेकर यांचा भाजप पक्षप्रवेश आज दुसऱ्यांदा रखडला आहे. त्यांचा आज पक्षप्रवेशाचा कार्यक्रम पार पडणार होता. पण आज तसं होऊ शकलेलं नाही.
ज्या पक्षासाठी 20 वर्ष जीवाचे रान करून एकनिष्ठ राहिलो. त्याच पक्षाने एक प्रकारे बडतर्फीच्या कारवाईने निष्ठेचे फळच दिल्याची भावना खेडेकर यांनी बडतर्फी आदेश निघताच बोलून दाखवली. गणेशोत्सव दरम्यान कोकणातील मंत्री नितेश राणे यांची भेट घेऊन त्यांनी भाजपात प्रवेश करण्याच्या निर्णय घेतला. त्यानुसार 4 सप्टेंबर रोजी नरीमन पॉईंट, मुंबई येथील भाजप प्रदेश कार्यालयात भाजपचे प्रदेशाध्यक्ष रवींद्र चव्हाण यांच्यासह अन्य नेत्यांच्या उपस्थितीत भाजपात पक्षप्रवेश होणार असल्याचे जाहीर केले होते.
शेकडो समर्थकांसह वैभव खेडेकर हे पक्षप्रवेशाची तयारी करत असतांना मात्र मराठा आंदोलनामुळे हा पक्षप्रवेश पुढे ढकलण्यात आला असल्याची माहिती त्यांच्यामार्फत देण्यात आली. भाजप नेते, खासदार तथा माजी मंत्री नारायण राणे यांची पण तब्येत त्याच दरम्यान बिघडलेली होती. हे पण एक कारण सांगण्यात आलेलं होतं.
तदनंतर मनसे नेते वैभव खेडेकर यांचा भाजप पक्षप्रवेशाचा मुहूर्त कधी निघतो? याची उत्सुकता सर्व समर्थकांना लागलेली होती. त्यानुसार आज दुपारी 3 वाजता पक्षप्रवेशाचे फ्लेक्स लागलेले पाहायला मिळाले. त्यानुसार समर्थकांसह वैभव खेडेकर हे मुंबईत दाखल झाले सुद्धा.. भाजप कार्यालयाकडून पक्षप्रवेशाचे प्रेस नोट सुद्धा आज निघालेल्या नव्हत्या. दरम्यान वैभव खेडेकर हे रवींद्र चव्हाण यांच्या रायगड या बंगल्यावर दाखल झाल्यानंतर त्या ठिकाणी फक्त कर्मचारी पाहायला मिळाले. कुठलाही बडा नेता त्या ठिकाणी नव्हता. स्वतः रवींद्र चव्हाण या ठिकाणी नव्हतेच.
आजच्या मंत्रिमंडळ बैठकीनंतर स्वतः नितेश राणे हे दिल्लीला केंद्रीय रेल्वेमंत्री अश्विनी वैष्णव यांच्याकडे कामानिमित्त निघून गेले. त्यानंतर मात्र वैभव खेडेकर यांची आणि समर्थकांची अस्वस्थता पाहायला मिळाली. प्रवेशाची जय्यत तयारी करून मुंबईत येऊन सुद्धा जर पक्षप्रवेश होत नसेल तर माशी नेमकी शिंकली कुठे? हा प्रश्न पडतोच.
वैभव खेडेकरांच्या पक्षप्रवेशामागे पडद्यामागे मोठ्या हालचाली घडतायत, असं विश्वसनीय सूत्रांकडून समजतंय. मुंबईतीलच एका बड्या प्रादेशिक राजकीय पक्षाचा नेता वैभव खेडेकरांचा भाजप पक्षप्रवेश होऊ नये याकरिता काम करीत असल्याची विश्वसनीय सूत्रांची माहिती आहे. बातमी लिहेपर्यंत कोकणातील नेते वैभव खेडेकर यांचा भाजप पक्षप्रवेश रखडलेला आहे. दुसऱ्यांदा पक्षप्रवेश हुकलेल्या वैभव खेडेकर यांचा भाजप प्रवेश नक्की कधी होतो? हे आता आगामी काळच ठरवेल.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा