प्रमोद शिंगे यांच्या मित्राने काही काळापूर्वी प्रेमविवाह केला होता, ज्याकरिता प्रमोद यांनी त्याला मदत केली होती. या विवाहाला विरोध करणाऱ्या जमीर हासीम मुलाणी (वय 50) आणि त्यांच्या मुलगा आर्यन (वय 30, रा. जांभळी, ता. शिरोळ) यांच्यासह त्यांचे दोन साथीदारांनी राग मनात धरला होता. त्यांनी प्रमोद यांच्यावर कारवाई करण्याचा निर्णय घेतला होता. प्रेमविवाहाच्या पार्श्वभूमीवर त्यांच्यात मनात राग असल्यानेच हा गंभीर हल्ला घडल्याचे प्राथमिक तपासात स्पष्ट झाले आहे.

नेमकं काय घडलं..?

शनिवारी सकाळी साडेदहाच्या सुमारास प्रमोद व अश्विनी शिंगे कामासाठी ग्रामपंचायतीमध्ये गेले होते. काम संपल्यावर ते चारचाकी गाडीत बसत असताना, तोंडावर स्कार्फ बांधून आलेल्या चार ते पाच हल्लेखोरांनी त्यांच्यावर कोयत्याने जोरदार हल्ला केला. या खुनी हल्ल्यामध्ये प्रमोद यांच्या उजव्या हाताचे बोट तुटले, तसेच खांदा, पोट आणि मानेवरही गंभीर जखमा झाल्या. तर पत्नी अश्विनी यांनी हल्लेखोरांना थांबविण्याचा प्रयत्न केला असतानाच त्यांनाही हाताच्या पंजावर मार लागला. हल्लेखोरांनी दहशत माजवून दाम्पत्याच्या चारचाकी वाहनाच्या काचा फोडल्या, ज्यामुळे गाडीचे मोठे नुकसान झाले. या घटनेनंतर मोठा गोंधळ उडाला. परिसरातील नागरिक जमल्यानंतर आरोपींनी घटनास्थळावरून पळ काढला.

या घटनेची माहिती मिळताच शिवाजीनगर पोलिस ठाण्याच्या पथकाने तातडीने घटनास्थळी धाव घेऊन पाहणी केली. आरोपींच्या शोधासाठी ताबडतोब कारवाई केली. जखमी दाम्पत्याला इचलकरंजी येथील आयजीएम रुग्णालयात उपचारासाठी दाखल केले आहे. तसेच पोलिसांनी घटनास्थळावरुन तीन हत्यारे जप्त केली आहेत. याठिकाणी प्रमोद यांचे तुटलेले बोटही सापडले आहे. शिवाजीनगर पोलिसांत या घटनेची नोंद झाली आहे. पोलिसांनी खुनी हल्ला, ॲट्रॉसिटीसह संबंधित गुन्हा नोंदवला आहे. तसेच आरोपी जमीर मुलाणी व त्यांचा मुलगा आणखी दोन संशयितांना पोलिसांनी ताब्यात घेतले असून पुढील तपास सुरु आहे.

दरम्यान, ही घटना कबनूर पोलिस चौकीपासून अगदी 70-80 फूट अंतरावर घडल्याने गावात खळबळ उडाली आहे. ग्रामस्थांनी पोलिसांकडे अधिक सुरक्षेची मागणी केली असून पोलिसांनी गावातील तपास वाढवला आहे. आरोपींनी भागातील सीसीटीव्ही कॅमेरे फोडल्याचेही समोर आले आहे, ज्यामुळे तपास अधिक कठीण झाला. दरम्यान हा हल्ला प्रेमविवाहासाठी केलेल्या मदतीच्या पार्श्वभूमीवर झाल्यामुळे सामाजिक स्तरावरही मोठी खळबळ उडाली आहे. जखमी दाम्पत्य लवकरात लवकर बरे होण्याच्या दृष्टीने त्यांच्यावर उपचार सुरु आहेत. तर पोलिसही घटना गांभीर्याने घेत पुढील कारवाई करत आहेत.