वृत्तानुसार, बीड जिल्ह्याच्या केज तालुक्यात शिक्षण विभागात एका अधिकाऱ्याने एका अल्पवयीन मुलीचे लैंगिक शोषण केले असल्याची माहिती मिळताच जिल्ह्यात संतापाची लाट पसरली आहे. शिक्षण क्षेत्र हे फार प्रतिष्ठेचे आणि आदराचे मानले जाते. शिक्षकाला गुरूस्थानी ठेवून त्यांची आपण पूजा करतो. आपल्या परिवारानंतर आपण शिक्षकावर मोठा विश्वास ठेवून मुले सोपवतो. मात्र शिक्षकच गैरवर्तन करत असेल तर विश्वास नेमका कोणावर ठेवायचा, हा प्रश्न उपस्थित होत आहे.

बीड येथील शिक्षण विभागात कार्यरत असलेल्या एक अधिकारी त्याच्या खाजगी गाडीतून एक महिला व त्या अल्पवयीन मुलीला घेऊन जात होता. त्या मुलीशी तो अधिकारी गैरवर्तन करीत असल्याचे महिलेच्या लक्षात आले म्हणून तिने मदतीसाठी संपर्क साधला, असे तक्रारीत सांगण्यात आले आहे. त्यानंतर काही युवकांनी त्या मुलीची नराधमाच्या तावडीतून सुटका करण्यासाठी त्या गाडीचा पाठलाग करून अखेर मोठ्या मुश्किलीने त्या गाडीला अडवण्यात यश आले. मात्र त्या नराधम अधिकाऱ्याच्या लक्षात येताच त्याने त्याचा मोबाईल आणि गाडी सोडून पळून गेला आणि मुलगी बचावली, असल्याचे सांगण्यात आले आहे.

महिला व ती अल्पवयीन मुलगी यांनी जिल्हा पोलिस अधीक्षक कार्यालय गाठून त्या अल्पवयीन मुलीने तिच्यावर घडलेला प्रसंग पोलिस अधिकाऱ्या समोर सांगितला. पीडित अल्पवयीन मुलीच्या तक्रारीवरून, पोलिस उपनिरीक्षक सुकुमार उर्फ राकेश बनसोडे यांनी प्रभारी गटशिक्षणाधिकारी लक्ष्मण बेडसकर याच्या विरुद्ध गु. र. नं. ५०९/२०२५ भा. न्या. सं. ७४, ७५(१)(२), ३५१(२) आणि पोक्सो अंतर्गत अधिनियम २०१२ चे कलम ८ आणि १० नुसार गुन्हा दाखल केला आहे.

परिस्थितीचे गांभीर्य लक्षात घेत पोलिसांनी त्या नराधम गटशिक्षणधिकाऱ्याविरोधात पोक्सोचा गुन्हा दाखल करण्यात आला असल्याचे ही सांगण्यात आले आहे. तर आरोपी फरार असून त्याचा शोध घेतला जात असल्याचेही सांगण्यात आले आहे. या प्रकरणात पोलीस निरीक्षक स्वप्नील उनवणे यांच्या मार्गदर्शनाखाली पिंक पथकाचे पोलीस उपनिरीक्षक प्रकाश शेळके हे तपास करीत असल्याचे सांगण्यात येत आहे.