कोल्हापूर जिल्ह्यात 16 सप्टेंबर रात्री 12 वाजल्यापासून ते 17 सप्टेंबर रात्री 12 वाजेपर्यंतच्या 24 तासांत गोरगरीब कुटुंबांमध्ये जन्मलेल्या प्रत्येक मुलीला सोन्याची अंगठी देण्यात आली आहे. याच औचित्याने सीपीआर हॉस्पिटलमधील कुटुंबांना थेट या उपक्रमाचा लाभ मिळाला. कोल्हापूर जिल्ह्यातील एकूण 42 मुलींना सुवर्ण अंगठी देण्यात आली आहे. यामध्ये सीपीआर रुग्णालयात जन्माला आलेल्या 8 मुलींना ही सोन्याची अंगठी देण्यात आली. तर जिल्ह्यातील ग्रामीण आरोग्य केंद्रांमध्ये जन्माला आलेल्या 8 मुलींना या उपक्रमातून अंगठी मिळाली आहे. यामध्ये दोन जुळ्या मुलींचा देखील समावेश होता.

या उपक्रमाच्या उद्देशाबद्दल बोलताना भाजपचे राज्यसभा खासदार धनंजय महाडिक यांनी स्पष्ट केले की, मुलींच्या जन्माबाबत समाजात आजही नकारात्मक विचार आहेत. ते विचार बदलून सकारात्मक दृष्टीकोन समाजात रुजावा, यासाठी हा उपक्रम राबवण्यात येत आहे. प्रधानमंत्री मोदी महिलांसाठी लखपती दीदी, ड्रोन दीदी, लाडकी बहीण यासारख्या अनेक योजना राबवत आहेत. त्याच धर्तीवर हा एका दिवसाचा वेगळा प्रयोग करण्यात येत असल्याचे महाडिक यांनी बोलताना सांगितले.

Pune Crime: आयुष कोमकर हत्या प्रकरणात नव्या व्यक्तीची एन्ट्री, मामी पोलिसांच्या रडारवर, वनराज आंदेकरच्या पत्नीचा रोल काय?

स्त्रियांचा प्रतिकात्मक सन्मान
सोनेरी अंगठी हा एक प्रतिकात्मक सन्मान आहे, परंतु त्याचा सामाजिक अर्थ अधिक खोल आहे. मुलगी झाल्यास निराश होणाऱ्या मानसिकतेवर प्रहार करण्याचा आणि मुलींचा जन्म हा आशीर्वाद आहे, वरदान आहे, हे पटवून देण्याचा हा प्रयत्न आहे. त्यामुळेच हा उपक्रम राबवत असल्याचे धनंजय महाडिक यांनी सांगितले आहे.

वर्षभर मुलींच्या कुटुंबाला चंदनाचे झाड..
याशिवाय, महाडिक यांनी आणखी एक अभिनव योजना जाहीर केली आहे. पुढील पूर्ण वर्षभर, ज्या कुटुंबात कन्यारत्नाचा जन्म होईल, त्या कुटुंबाला 2 चंदनाची झाडे भेट म्हणून देण्यात येणार आहेत. खरंतर चंदनाची लागवड कायद्याने बंदी आहे. मात्र कायदेशीर प्रमाणपत्रासह ही झाडे देण्यात येणार असून या झाडाच्या वाढीनंतर त्यातून होणारे साधारण 50 लाखांचे उत्पन्न संबंधित मुलीच्या शिक्षण आणि विवाहासाठी उपयोगी पडेल, अशी दूरदृष्टी यासाठी ठेवण्यात आली आहे. त्यामुळे ही योजना लोकांच्या आकर्षणाचे आणि कुतूहलाचे केंद्र बनली आहे.

कोल्हापुरातून सुरु झालेला हा उपक्रम अत्यंत स्तुत्य असून सर्वत्र याचे अनुकरण होणे गरजेचे असल्याचे मत यावेळी मंत्री आशिष शेलार यांनी व्यक्त केले आहे. सर्व मुलींना आणि त्यांच्या कुटुंबियांना यावेळी शुभेच्छा देत शेलार यांनी खासदार महाडिकल यांच्या संकल्पणेतून राबवलेल्या उपक्रमांचे भरभरुन कौतुक केले. तसेच या उपक्रमाचा संदेश आणि उद्देश राज्यभरात सकारात्मकतेने पोहोचेल, अशी अपेक्षाही व्यक्त केली आहे. दरम्यान पंतप्रधान मोदींनी देशभरात महिलांसाठी ‘लाडकी बहीण’सारख्या विविध योजना आणल्या. त्याच धर्तीवर त्यांच्या वाढदिवशीचा सुवर्ण अंगठी आणि चंदनाचे झाड उपक्रम समाजाच्या दृष्टीने एक वेगळा आदर्श निर्माण करणारा ठरत आहे.

कोल्हापुरात ‘नमो ऑक्सिजन पार्क’

कोल्हापूर जिल्ह्यातील गडमुडशिंगी येथे मोदींच्या वाढदिवसानिमित्त विशेष वृक्षारोपणाचा कार्यक्रमही पार पडला. महाराष्ट्र शासन वन विभाग, भारतीय जनता पार्टी आणि गडमुडशिंगी ग्रामपंचायत यांच्या संयुक्त विद्यमाने आयोजित या उपक्रमात “नमो ऑक्सिजन पार्क” तयार करण्यात येणार आहे. “एक झाड माँ के नाम” या संकल्पनेतून यावेळी एकूण 75 वडाची रोपे लावण्यात आली आहेत. या रोपांमुळे भविष्यात मोठ्या प्रमाणात प्राणवायू निर्मिती होऊन पर्यावरणाचा समतोल राखण्यास मदत होईल, असा विश्वास व्यक्त करण्यात आला. या कार्यक्रमाला मंत्री आशिष शेलार, खासदार धनंजय महाडिक, भाजप पदाधिकारी, वन अधिकारी, ग्रामपंचायत सदस्य आणि नागरिक उपस्थित होते.

लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा