८.१६ वाजता पाळी-भूतवली धरणाजवळ त्यांच्या मोबाईलचे शेवटचे लोकेशन ट्रेस झाले आहे. त्यानंतर त्यांचा फोन बंद आहे. त्यानंतर ते कुठे गेले, याचा थांगपत्ता लागलेला नाही. त्यामुळे या प्रकरणाचे गूढ वाढत चालले आहे. मूळचे राजस्थानातील भिवानी जिल्ह्यातील असलेले चौहान, सध्या मुंबईत पोस्टिंगमुळे कुलाबा येथे वास्तव्यास होते.

बेपत्ता झाल्याची तक्रार नोंदवल्यानंतर महाराष्ट्र माउंटेनियर रेस्क्यू कोऑर्डिनेशन सेंटर म्हणजेच MMRCC, भारतीय नौदल आणि वन विभाग यांनी संयुक्त शोधमोहिम हाती घेतली आहे. भिवपुरी आणि माथेरान दरम्यानच्या खडकाळ जंगली प्रदेशात शोधकार्यात मदत करण्यासाठी गुरुवारपासून ड्रोन तैनात करण्यात आले. ‘शोधमोहिमेत स्वयंसेवक, नौदल व वन विभागाचे अधिकारी यांच्यासाठी एक खास व्हॉट्सअॅप ग्रुप तयार करण्यात आला आहे, अशी माहिती MMRCC च्या प्रवक्त्याने दिली.

दरम्यान, कुटुंबीय, नातेवाईक आणि स्वयंसेवकांनी भावनिक आवाहन करताना परिसरातील गिर्यारोहक व स्थानिक नागरिकांना जागरूक राहण्याचे आवाहन केले आहे. कुणालाही चौहान यांच्याबाबत ठोस माहिती मिळाल्यास तत्काळ प्रशासनाशी संपर्क साधण्याचे आवाहन केले जात आहे. या प्रकरणाची नोंद नेरळ पोलिसांकडे तसेच कफ परेड पोलिस ठाण्यात करण्यात आली असून, सहा दिवस उलटूनही अधिकाऱ्याचा काहीच मागमूस न लागल्याने परिसरात संभ्रम, भीती व गूढतेचे सावट निर्माण झाले आहे.