स्फोटाचा आवाज एवढा प्रचंड होता की त्याचे हादरे बाजारगावसह शिवा, सावंगा आणि आसपासच्या दहा गावांत जाणवले. घाबरलेल्या नागरिकांनी मध्यरात्री घराबाहेर धाव घेतली. स्फोटानंतर कारखान्यातील लाखो रुपयांची यंत्रसामग्री व साहित्य जळून खाक झाले. नागपूर-अमरावती महामार्गालगत असलेल्या या युनिटमध्ये ग्रेनेड, ड्रोन्स आणि विविध स्फोटके तयार केली जातात. त्यातीलच PP-15 प्लांटमध्ये रात्री 12:34 वाजता ही दुर्घटना घडली.

देशात मुदतपूर्व निवडणूका, कामाला लागा, काँग्रेसच्या बड्या नेत्याचं कार्यकत्यांना आवाहन

सोलर एक्सप्लोसिव्हमध्ये मध्यरात्री झालेल्या अपघातात आरएनडी लॅबमधील मयूर गणवीर नावाच्या कामगाराचा मृत्यू झाला. कारखान्यात HMX, TNT आणि RDX सारखी स्फोटके तयार केली जातात. काम सुरू असताना धूर निघत असल्याचे दिसल्यावर बहुतेकांना बाहेर काढण्यात आले आणि त्यामुळे आणखी मोठी दुर्घटना टळली. मात्र मयूर यांचा जीव वाचवता आला नाही. घटनास्थळी मलब्याचे ढीग आणि दूरवर फेकलेले साहित्य पाहून स्फोट किती भीषण होता याची कल्पना येते.

गेल्या काही वर्षांत विदर्भात वारंवार अशा स्फोटाच्या घटना घडत आहेत. डिसेंबर 2023 मध्ये याच कंपनीत झालेल्या स्फोटात नऊ कामगारांना प्राण गमवावे लागले होते. तर जून 2024 मध्ये अमरावती मार्गावरील धामना येथील चामुंडी एक्सप्लोजिव्हमध्ये झालेल्या दुर्घटनेत नऊ जणांचा मृत्यू झाला होता. सातत्याने होणाऱ्या या घटनांमुळे प्रशासन आणि कंपन्यांच्या सुरक्षा यंत्रणांवर प्रश्नचिन्ह उपस्थित झाले आहे.

दरम्यान, या अपघातामुळे कामगारांच्या सुरक्षिततेबाबत गंभीर प्रश्न निर्माण झाले आहेत. विदर्भातील नागपूर, भंडारा, चंद्रपूर या जिल्ह्यांत सरकारी तसेच खासगी स्फोटक निर्मिती कारखाने आहेत. लष्करी वापरासाठी बॉम्ब, अग्निबाण, कवच आणि इतर स्फोटके येथे तयार होतात. मात्र सतत होणाऱ्या स्फोटांमुळे या कारखान्यांतील कामगारांचे जीव धोक्यात आले आहेत. या नव्या दुर्घटनेने नागपूर जिल्ह्यातील नागरिक आणि कामगार वर्गात तीव्र अस्वस्थता पसरली आहे.