योगेश आलेकरी हे मूळचे महाराष्ट्रातील नवी मुंबईचे आहेत. ते एकटेच बाईकवरुन जगभ्रमंतीसाठी निघाले आहेत. मे महिन्याच्या सुरुवातीला भारतातून त्यांनी या प्रवासाला सुरुवात केली होती. मात्र त्यांची बाईक ब्रिटनमधील नॉटिंगहॅम शहरात चोरीला गेली. त्यामुळे त्यांनी तेथील पोलिसांवर जोरदार टीका केली आहे. पोलिसांनी गुन्हेगारी रोखण्यासाठी काहीच केले नाही, असा त्यांचा आरोप आहे.

“या प्रवासात माझी बाईकच माझे सर्वस्व होते. ती माझं स्वप्न आहे, माझी आवड आहे, माझा आत्मा आहे. ते माझं घर होतं, पण आता हे घरच चोरीला गेलं आहे,” असं योगेश भावनिक होत म्हणाले.

“माझ्या बाईकवर खूप सामान होते. मी माझे सर्वस्व गमावले आहे. माझ्याकडे फक्त जॅकेट, बूट आणि हेल्मेट राहिले आहे. मी टुरिस्ट व्हिसावर आलो आहे आणि या देशात पर्यटकांसाठी कोणतीही सुरक्षा नाही. जर ही घटना भारतात एखाद्या परदेशी व्यक्तीसोबत घडली असती, तर संपूर्ण पोलीस दल आणि भारत सरकारने चोरांना पकडण्यासाठी कोणतीही कसर ठेवली नसती. मी माझ्या आयुष्यातील सर्वात वाईट परिस्थितीतून जात आहे.” असंही योगेश म्हणाले.

नॉटिंगहमशायर पोलिसांचे सार्जंट डॅनियल शेस्बी म्हणाले, “आमचे पोलीस पथक गेल्या गुरुवारपासून तपास करत आहे. पण दुर्दैवाने आम्हाला अजूनही बाईक सापडलेली नाही. बाईक मालकाला किती त्रास झाला असेल, हे आम्ही समजू शकतो. पण पोलिसांनी हे प्रकरण गांभीर्याने घेतले आहे, याची आम्ही त्यांना खात्री देतो.”

नेमकं काय घडलं?

28 ऑगस्ट रोजी आलेकरी यांनी त्यांची KTM 390 Adventure मोटरसायकल सकाळी 11 वाजता वोलॅटन पार्कमधील एका सुरक्षित पार्किंगमध्ये लावली होती. त्यांनी पार्किंगसाठी शुल्कही भरले होते. ते नाश्ता करण्यासाठी गेले आणि वीस मिनिटांनंतर परत आले, तेव्हा त्यांची बाईक गायब होती. त्यांच्या बाईकबरोबर लॅपटॉप, कॅमेरा, पैसे, पासपोर्ट आणि क्रेडिट कार्डही चोरीला गेले.
Bhakti Mayekar : प्रेग्नंट प्रेयसीआधी दुर्वासने दोन खून पचवले, भक्ती मयेकरला फोनवरुन छळणाऱ्या 50 वर्षीय बार कर्मचाऱ्याचा काटा काढलेला अन्…
आलेकरी यांनी पोलिसांना फोन करून बाईक चोरीला गेल्याची तक्रार केली. पण पोलीस घटनास्थळी आले नाहीत. त्यांनी फक्त आलेकरी यांना एक क्राइम नंबर दिल्याचं आलेकरींनी सांगितलं.

काही मुलींनी मोबाईलमध्ये बाईक चोरीचा व्हिडिओ रेकॉर्ड केला होता. आलेकरी म्हणाले, “व्हिडिओमध्ये चोर हातोड्याने लॉक तोडताना दिसत आहेत. त्यांनी बाईकवर बनावट नंबर प्लेट लावली आणि ते पळून गेले. मी तो व्हिडिओ पोलिसांना दाखवला आणि त्यांच्याशी दोन तास चर्चा केली. पण ते काहीच करत नाहीत.”
Pune Crime : बारामतीतील ‘गुरुजीं’वर हनीट्रॅप, 54 वर्षीय ZP शिक्षकाला नग्न व्हिडिओ व्हायरल करण्याची धमकी अन्…
आलेकरी पुढे म्हणाले, “चोरांना कोणाचाही धाक नाही. ते बिनधास्तपणे बाईक चोरतात. त्यांना पोलिसांची भीती नाही. भारत हा प्रवासासाठी सर्वात सुरक्षित देश आहे. आम्ही भारतात आमच्या गाड्यांचे व्हील लॉकसुद्धा करत नाही. हे आमच्या पोलिसांचे यश आहे. यूकेचे पोलीस चोरी रोखण्यात अपयशी ठरले आहेत. मला मुंबई पोलिसांची आठवण येते.”

आलेकरी सध्या लंडनमध्ये आहेत. ते भारतीय उच्चायुक्तालयाकडून इमर्जन्सी कागदपत्रे मिळवण्याचा प्रयत्न करत आहेत. त्यांना कदाचित यूके सोडावे लागेल. या घटनेमुळे योगेश आलेकरी खूप निराश झाले आहेत. त्यांनी यूके पोलिसांच्या कार्यक्षमतेवर प्रश्नचिन्ह उपस्थित केले आहे.